Մեծ Բրիտանիայի ու Գերմանիայի կինեմատոգրաֆիստները գեղարվեստական ֆիլմ կնկարահանեն WikiLeaks-ի հիմնադիր Ջուլիան Ասանժի ճակատագրի մասին:
Ինչպես այսօր հայտնել են Միացյալ թագավորության ԶԼՄ-ները, ծագումով ռուս, գերմանացի ռեժիսոր Կիրիլ Տուշին բրիտանացի գրող Մայքլ Գեստերի հետ արդեն սկսել են աշխատանքներն անգլալեզու ժապավենի վրա:
Ինչպես սպասվում է, ժապավենը լույս կտեսնի հետևյալ անվանումով. «Արտահոսք. երեք տեսակցություն Հարրի Հարիսոնի հետ» (Leaks – Three Dates With Harry Harrison):
Ֆիլմի սյուժեն կկառուցվի երեք հորինովի ռոմանտիկ ինտերնետ-ծանոթությունների շուրջ, որոնց ժամանակ գլխավոր հերոսը ներկայանում է որպես Հարրի Հարիսոն: Այդ երեք հանդիպումների ժամանակ հեղինակները կփորձեն հետևել Ասանժի կյանքի ուղուն` սկսած մանկությունից մինչև WikiLeaks-ի գործարկում, ինչից հետո նա ձեռք բերեց համաշխարհային հռչակ:
Նախատեսվում է, որ ֆիլմի նկարահանման աշխատանքները կսկսվեն արդեն հաջորդ տարի Գերմանիայում: Առայժմ հայտնի չէ, թե ով կմարմնավորի գլխավոր հերոսին: