Իսպանիայի իշխանությունները պաշտոնապես ԵՄ-ից օգնություն են խնդրել երկրում բանկերի ռեկապիտալիզացիայի համար: Այս մասին հաղորդում է The Telegraph թերթի Live blog-ը, որը նվիրված է եվրոգոտու պարտքային ճգնաժամին:
Agence France-Presse-ի տեղեկություններով` Մադրիդը ԵՄ-ից խնդրել է 100 մլրդ եվրո: Գումարի հստակ չափը հայտնի կդառնա միայն հավելյալ բանակցություններից հետո:
Անցած շաբաթ անկախ աուդիտորները հրապարակել էին ստուգումների արդյունքները, որոնք պարզել էին, որ ճգնաժամի սրացման դեպքում իսպանական բանկերին անհրաժեշտ կլինի 62 մլրդ եվրո հավելյալ կապիտալ:
Ավելի վաղ Reuters-ը, հղում կատարելով անանուն աղբյուրներին, հայտնել էր, որ 19 մլրդ եվրոն նախատեսված է Bankia-ի համար, իսկ 20 մլրդ եվրոն` NovaGalicia-ի ու CatalunyaCaixa-ի համար, որոնք արդեն ստացել են պետական օգնություն:
Իսպանիայի բանկային հատվածը զգալի չափով տուժել է անշարժ գույքի շուկայում գնանկումից:
