Նյու Հեմփշիրի Դարեմ քաղաքի իշխանությունները Բարաք Օբամայի նախընտրական շտաբից պահանջել են վճարել իր այցի հետ կապված ծախսերը: Այս մասին հաղորդում է Foc News հեռուստաալիքը:
Հաշվի են առնվում անվտանգությունն ապահովող ոստիկանության և հրշեջ ծառայությունների աշխատանքների վճարի հետ կապված լրացուցիչ ծախսերը: Քաղաքի իշխանություններն ընդգծում են, որ պատրաստ են եղել իրենց վրա վերցնել նախագահական այցի հետ կապված ծախսերը, սակայն Օբաման պատրաստվում է Դարեմ այցելել նախընտրական քարոզարշավի շրջանակներում:
Օբամայի այցի հետ կապված ծախսերը Դարեմի իշխանությունները գնահատում են 20-30 հազար դոլար: Քաղաքի բնակիչներից մեկը, որը չի ցանկացել ներկայանալ, արդեն համաձայնել է այդ նպատակով վճարել մինչև 20 հազար դոլար: Ինչպես հաղորդում է Associated Press-ը, այս մասին պատմել է քաղաքային խորհրդի ներկայացուցիչ Ջեյ Գուզը: Նա նաև հայտարարել է, որ տեղի իշխանությունների որոշումը քաղաքական ենթատեքստ չունի. Ընտրողների մեծ մասը աջակցում են Դեմոկրատական կուսակցութանը:
Օբամայի այցը պետք է տեղի ունենա հունիսի 25-ին:
Նախագահական ընտրություններն ԱՄՆ-ում տեղի կունենան 2012թ. նոյեմբերի 6-ին: Օբամայի մրցակիցը, ամենայն հավանականությամբ, կլինի Մասաչուսեթսի նախկին նահանգապետ Միթ Ռոմնին:
