Ակնհայտ է, որ ՀՀ նախկին արտգործնախարար, «Բարգավաճ Հայաստան» կուսակցության անդամ Վարդան Օսկանյանի նկատմամբ քաղաքական հետապնդում է իրականացվում: «Առաջին լրատվական»-ի հետ զրույցում նման տեսակետ հայտնեց ՌԱՀՀԿ փորձագետ Սարո Սարոյանը՝ անդրադառնալով փաստին, որ ՊԵԿ-ը պահանջել է «Սիվիլիթաս» հիմնադրամի ֆինանսական գործունեության փաստաթղթերը:
Նրա խոսքով՝ միանշանակ կարելի է ասել, որ պատկան մարմիններին հանձնարարվել է ամեն գնով հիմնադրամի գործունեության հետ կապված որոշակի բարդություններ ստեղծել: «Սա նպատակ է հետապնդում ինչ-ինչ օրինախախտումներ վեր հանել, որպեսզի խնդիրներ լուծելու ժամանակ հնարավոր լինի Օսկանյանի վրա ճնշումներ գործադրել»,- նկատեց Սարո Սարոյանը:
Փորձագետը նաև նշեց, որ փողերի լվացման հատկանիշներով հարուցված քրգործի շրջանակներում Վարդան Օսկանյանին հարցաքննության կանչած ԱԱԾ-ն ու «Սիվիլիթաս» հիմնադրամի ֆինանսական գործունեության փաստաթղթերը պահանջած ՊԵԿ-ը իրենց տրված հանձնարարությունն են կատարում: «Բայց այս պարագայում կարևոր է ոչ այնքան կոնկրետ խնդրի վերհանումը, որքան իրավախախտումներ հայտնաբերելու նպատակով իջեցված պատվերը: «Սիվիլիթաս» հիմնադրամի անունը կապվում է Վարդան Օսկանյանի հետ, նրա անունն իր հերթին՝ ԲՀԿ-ի հետ, իսկ ահա ԲՀԿ առաջնորդ Գագիկ Ծառուկյանի անձը՝ կոալիցիոն կառավարություն չկազմելու: Այս ամբողջ շղթան է, որ առավել ակնառու է դարձնում քաղաքական հետապնդումը: Գործընթացներին հետևողները պետք է հասկանան, որ սա քաղաքական պատվեր է»,- ամփոփեց Սարո Սարոյանը:
Հիշեցնենք՝ «Սիվիլիթաս» հիմնադրամը հաղորդագրություն է տարածել, որով տեղեկացնում է, որ կառավարությանն առընթեր պետական եկամուտների կոմիտեի աշխատակիցներն այցելել են «Սիվիլիթաս» հիմնադրամ և պահանջել հիմնադրամի ֆինանսական գործունեության փաստաթղթերը հիմնադրման օրվանից՝ 2008 թվականի մայիսից:
«Պետեկամուտների կոմիտեի պահանջին զուգահեռ՝ «Սիվիլիթաս» հիմնադրամի խորհրդի անդամները հրավիրվել են Ազգային անվտանգության ծառայություն՝ ցուցմունք տալու գալիք շաբաթվա ընթացքում»,- ասված է հաղորդագրությունում:
Հիշեցնենք, որ ԱԱԾ-ն Հայաստանի նախկին արտգործնախարար, «Բարգավաճ Հայաստան» կուսակցության անդամ Վարդան Օսկանյանի հիմնադրած «Սիվիլիթաս» հիմնադրամին առնչվող գործ է հարուցել՝ փողերի լվացման հատկանիշներով:
