«Մարդը, մարդու կյանքը բարձրագույն արժեք է, ու դա պետք է հասկանանք: Մի բան հստակ է, որ մեղավորները պետք է հավուր պատշաճի պատասխանատվության ենթարկվեն: Ոչ մի բանական մարդ չի կարող արդարացնել դա»,- այսօր հայտարարեց ՀՀ արդարադատության նախարար Հրայր Թովմասյանը՝ պատասխանելով «Առաջին լրատվական»-ի հարցին՝ ինչո՞վ է բացատրվում, որ մեր երկրում ավելացել են ծեծի, ուժի կիրառման դեպքերը:
Դիտարկմանը, թե նման քայլերի առավել հաճախ դիմում են բարձրաստիճան պաշտոնյաների թիկնազորի անդամները, Հ. Թովմասյանը պատասխանեց, որ նախորդ տարվա համեմատ իրավիճակը բավականին կարգավորվել է, էական դրական տեղաշարժ կա. «Դեռ մեկ տարի առաջ շարասյուներ և այլն շատ կտեսնեիք: Հիմա չկան: Նման 1-2 միջադեպերը ինձ հուշում են այլ բանի մասին՝ միգուցե հասարակական սպասարկման օբյեկտներում անվտանգության ապահովման չափորոշիչներ պետք է սահմանվեն, և պետք է լինեն ծառայություններ՝ կա՛մ լիցենզավորված, կա՛մ պետության կողմից որ իրականացվեն»: Նախարարը հայտնեց, որ իր տեղակալներց մեկին հանձնարարել է ուսումնասիրել դրա վերաբերյալ միջազգային փորձը:
Հ. Թովմասյանը նշեց, որ «Հարսնաքար»-ում տուժածներից մեկն իր հարևանն է և նրա ծնողների հետ երեկ երեկոյան էլ հանդիպել է, խոսել: Ներկայում ընթացող նախաքննությանը նախարարն իրավասու չէ միջամտել:
«Իմ լավ ընկեր, իմ լավ բարեկամ ոստիկանապետը շատ լավ է կատարում իր պարտականությունները»,- նկատեց Հ. Թովմասյանն՝ ընդգծելով, որ Ռուբեն Հայրապետյանն առաջին ցանկացողն է, որ մեղավորներն արժանի պատիժ կրեն:
