«Հաճախ ենք նկատում, որ բժիշկներին վատ են վերաբերվում: Միայն բացասական վերաբերմունքն է ծնում այն, ինչ ունենք այսօր, երբ ինչ-որ մարդիկ իրենց իրավունք են վերապահում վտանգի տակ դնելու այն բժշկի կյանքը, ով հազարավոր կյանքեր է փրկում»,- լրագրողների հետ հանդիպմանը ասաց Հայկական բժշկական ասոցիացիայի նախագահ Պարունակ Զելվեյանը:
Նա նշեց, որ մենք պետք է ամեն ինչ անենք բժշկի վեհ կերպարը հասարակության մեջ բարձրացնելու համար, քանի որ միայն վատը ասելով՝ ավելի ենք բարդացնում իրավիճակը. «Բացթողումների մասին, իհարկե, պետք է խոսվի, որպեսզի ունենանք բարձր որակի առողջապահական համակագ: Ամեն դեպքում, անգամ եթե կան խնդիրներ, դա չի նշանակում, թե դրա համար պետք է մինչև մահվան աստիճան ծեծել բուժաշխատողին»:
Խոսելով ոլորտի ձեռքբերումների և բացթողումների մասին՝ մասնագետը նշեց, որ լավագույն ձեռքբերումը կարող ենք համարել պետական ծառայողների և քաղծառայողների բժշկական ապահովագրությունը:
«Մոտ 126 հազար հոգի ունեցան ապահովագրություն, սակայն պետք է ունենանք ոչ միայն 126 հազարին ապահովագրելու հնարավորություն, այլև բոլորին: Կարևոր է շտապօգնության ծառայության վերազինումը և մինչև 7 տարեկան երեխաների անվճար բուժօգնությունը»,- ասաց նա:
Ըստ Զելվեյանի՝ ոլորտի ամենալուրջ բացթողումն այն է, որ այսօր մենք չունենք առողջապահության մասին մայր օրենք. «Երկար տարիներ է՝ պատրաստվում է առողջապահության մասին օրենքը, և հույս ունենք, որ այս ԱԺ-ում այն կընդունվի: Շատ խնդիրների պատճառը հենց մայր օրենքի բացակայությունն է: Խնդիր է նաև այն, որ բժիշկը արժանավայել գործելու համար չունի համապատասխան աշխատավարձ, որն էլ հաճախ դառնում է արատավոր երևույթների պատճառ:
«Բժիշկը դարձել է թիրախ ինչպես բուժղեկավարության, այնպես էլ հասարակության կողմից: Ամեն ինչում բժշկին են մեղադրում: Գուցե համակարգն ունի որոշակի թերություններ, և պետք է այն փոխել: Բայց բժշկին թիրախավորել չի կարելի»,- հավելեց ասոցիացիայի նախագահը:
