Վրացական GHN լրատվական գործակալության փոխանցմամբ՝ այսօր Թբիլիսիում վերսկսվել է ընդդիմադիր միլիարդատեր, «Վրացական երազանք» կոալիցիայի առաջնորդ Բիձինա Իվանիշվիլիի վրացական քաղաքացիության վերականգնման հարցով դատական գործընթացը:
Թբիլիսիի Վերաքննիչ դատարանը հայտարարել է, որ տվյալ հարցով իր որոշումը ներկայացնելու է հունիսի 29-ին, ժամը 10.00-ին:
Իվանիշվիլին Վրաստանի քաղաքացիությունից զրկվել էր նախագահ Միխեիլ Սաակաշվիլիի հրամանով՝ նախորդ տարվա աշնանը, ինչը տեղի էր ունեցել այն բանից օրեր անց, ինչ հայտարարել էր իր քաղաքական հավակնությունների և գործող իշխանությունների համար լուրջ ընդդիմության վերածվելու մտադրության մասին:
Իվանիշվիլին Վրաստանի քաղաքացիություն է ստացել 2004 թվականի հուլիսի 22-ին, ինչից հետո՝ 2010 թվականին, դարձել է Ֆրանսիայի քաղաքացի, ինչն էլ հանդիսացել է նրան Վրաստանի քաղաքացիությունից զրկելու պատճառ: 2011 թվականի դեկտեմբերի 29-ին Իվանիշվիլին դիմել է Ֆրանսիայի դեսպանատուն՝ այդ երկրի քաղաքացիությունից հրաժարվելու համար: Դրանից 3 օր առաջ էլ՝ դեկտեմբերի 26-ին, Իվանիշվիլին հրաժարվել էր Ռուսաստանի քաղաքացիությունից:
