«Երեկ ողջ օրը ոտքի վրա էր նման իրավիճակներում արագ կողմնորոշվող ՀՀԿ ֆրակցիայի նախագահ Գալուստ Սահակյանը: Չնայած ՀՀԿ-ից ընդամենը երեք պատգամավոր էր բացակայում, այնուհանդերձ, նա մեկ առաջին հարկում էր, մեկ՝ երկրորդ, հետո՝ երրորդ հարկում և այդպես շարունակ փորձում էր անել ամեն ինչ, որպեսզի ՀՀԿ-ն պատրաստ լինի հարկավոր ժամին կառավարության ծրագրին միահամուռ կողմ քվեարկելուն»,- գրում է «Հրապարակ»-ը և հավելում.
«Նա բերման էր «պատրաստել» նաև Ռուբեն Հայրապետյանին, որը պետք է քվեարկության պահին հայտնվեր դահլիճում, վերջինս բացակայում էր և հայտնի պատմության պատճառով փորձում էր հեռու մնալ լրագրողներից: Մեզ հետ զրույցում Սահակյանն ասել էր. Հայրապետյանն անպայման գալու է: Այդպես էլ եղավ: Նախավերջին նիստի ավարտին մի քանի րոպե էր մնացել, երբ միջանցքում հայտնվեց Ռուբեն Հայրապետյանը, որին անհամբեր սպասում էր Սամվել Ալեքսանյանը: Վերջինս դիմավորեց նրան՝ խիստ գործնական, միասին արագ անհետացան միջանցքում, չերևաց, թե որ սենյակ մտան:
Շատ մեծ էր Գալուստ Գրիգորիչի ափսոսանքը, որ այդքան աշխատանքից հետո պարզ դարձավ, որ քվեարկություն չի լինելու, որովհետև ելույթների համար գրանցվել էին խորհրդարանական պատմության մեջ եզակի թվով պատգամավորներ՝ 38 հոգի, չհաշված կառավարության ներկայացուցիչները: Գումարած Աժ խոսնակի արտահերթ ելույթը, ինչն ընդհանուր կտևեր 440 րոպե: Այնպես որ, այսօր ևս ՀՀԿ-ն ստիպված կլինի սաունաներից, ռեստորաններից, այլ վայրերից բերման ենթարկել իր պատգամավորներին՝ քվեարկելու: Հեշտ բան չիմանաք: Ամբողջ օրը խորհրդարանի միջանցքում թափառելով՝ Սամվել Ալեքսանյանն այնքան հարցազրույց տվեց, որ ընթացքում որոշեց, որ կարելի էր փողով հարցազրույցներ տալ, իսկ գեներալներ Սեյրանն ու Մանվելը, իրենց սենյակում նստած, այնքան էին ձանձրացել, որ թերթ էին կարդում»:
