Այսօր Հայաստանի պատմության թանգարանում տեղի ունեցավ Սբ. Մեսրոպ Մաշտոցին նվիրված գեղաթերթիկի մարման պաշտոնական արարողություն: Մարումն իրականացրեցին ՀՀ մշակույթի նախարար Հասմիկ Պողոսյանը, ՀՀ տրանսպորտի և կապի նախարար Գագիկ Բեգլարյանը, Հայփոստի հավատարմագրային կառավարիչ Խուան Պաբլո Գեչիջյանը, «Հայփոստ» ՓԲԸ գլխավոր տնօրենի պաշտոնակատար Հայկ Ավագյանը, Հայաստանի ֆիլատելիստների միության նախագահ Հովիկ Մուսայելյանը: Սբ. Մեսրոպ Մաշտոցին նվիրված գեղաթերթիկին պատկերված է Գրիգոր Խանջյանի հայտնի գոբելենը, որը ներկայումս պահվում է Մայր աթոռ Սբ. Էջմիածնում: Գեղաթերթիկի հեղինակն է Աշոտ Եղիազարյանը:
Հայ գրատպության 500-ամյակին նվիրված միջոցառումների շրջանակներում, «Հայփոստ» ՓԲԸ-ն ներկայացրեց նաև Հայոց այբուբենի տառերը պատկերող նույնատիպ թողարկման նամականիշերի նոր շարքը:
2007-2011 թթ. նույնատիպ թողարկման նամականիշերի վրա պատկերված էր Տիգրան Մեծի դիմանկարը: 2012թ-ից սկսվում է Հայոց այբուբենի տառերը պատկերող նույնատիպ նամականիշերի թողարկում, որոնք հաջորդաբար կթողարկվեն նաև առաջիկա տարիներին: 2012 թ.-ի ընթացքում շրջանառության մեջ դրվող նույնատիպ թողարկման նոր շարքի 7 նամականիշերի վրա պատկերված են այբուբենի Այբ տառից Է տառերը: Նամականիշերի հեղինակը Մարիամ Կանայանն է: 10 դրամից մինչև 280 դրամ անվանագին ունեցող այս նամականիշերը տպվել են Ֆրանսիայի Կարտոր (Cartor) տպարանում:
Հայ գրատպության 500-ամյակի շրջանակներում, Հայփոստը մարել և շրջանառության մեջ է դրել նաև «Հայ գրատպության 500-ամյակը. Երևանը` գրքի համաշխարհային մայրաքաղաք» թեմայով գեղաթերթիկը:
«Առաջին լրատվական»-ին «Հայփոստ» ՓԲԸ-ից հայտնեցին, որ ի թիվս այլ նամականիշերի, այս տարի կթողարկվեն «Հնագիտական գտածո» թեմայով նամականիշեր, որոնք նվիրված կլինեն Հայաստանում հայտնաբերված հնագույն կոշիկին, ինչպես նաև ավելի քան 5900 տարեկան կանացի ծղոտե փեշին: Կթողարկվեն Կոնյակագործության հիմնադրման 125-ամյակին, Լուսինե Զաքարյանի 75-ամյակին նվիրված և այլ նամականիշեր:
