Զարգացումները Վարդան Օսկանյանի և «Սիվիլիթասի» շուրջ ՀՀԿ-ԲՀԿ մրցակցության ձևերից են: Այսօր լրագրողների հետ հանդիպման ժամանակ նման տեսակետ հայտնեց Կովկաս ինստիտուտի տնօրեն, քաղաքագետ Ալեքսանդր Իսկանդարյանը` խոսելով ՀՀԿ-ԲՀԿ մրցակցության մասին:
Բանախոսը հետաքրքրական համարեց շարունակվող մրցակցությունը «Բարգավաճ»-ի և Հանրապետականի միջև: Ըստ նրա` այս մրցակցության ձևերը այն տեսքն են ընդունում՝ ինչպես Հայաստանում միշտ պատահում է:
«Հետաքրքրական են նաև զարգացումները Վարդան Օսկանյանի և «Սիվիլիթաս» հիմնադրամի շուրջ: Սա մրցակցության ձևերից մեկն է»,- նկատեց Ալեքսանդր Իսկանդարյանը:
Անդրադառնալով կառավարության ձևավորմանը` նա ասաց, որ անսպասելի որևէ բան տեղի չի ունեցել:
«Ցանկացած դիտորդի համար կառավարության կազմը որոշակիորեն հասկանալի էր. խորհրդարանական ընտրությունների արդյունքում ՀՀԿ-ն և ՕԵԿ-ը ունեցել են գերակշռող մեծամասնություն, այդպես է նաև կառավարությունում»,- պարզաբանեց քաղաքագետը` կանխատեսելով, որ իրական քաղաքականությունը կվերսկսվի սեպտեմբերին, իսկ մինչ այդ լուրջ զարգացումներ չեն լինի:
Ա. Իսկանդարյանը անդրադարձավ նաև Փարիզում Հայաստանի և Ադրբեջանի արտգործնախարարների հանդիպմանը` նշելով, որ ոչ մի սպասելիք չունի այդ հանդիպումից:
