Թուրքական Doğan լրատվական գործակալության փոխանցմամբ՝ Թուրքիայի վարչապետ Ռեջեփ Էրդողանը մեկնաբանել է փոխվարչապետ Բյուլենթ Արընչի այն հայտարարությունը, թե 1999 թվականից Մարմարա ծովի Իմրալը կղզում ցմահ ազատազրկում կրող քուրդ առաջնորդ Աբդուլլահ Օջալանին կարող է տնային կալանք տրվել, եթե նրա հիմնադրած Քրդստանի աշխատավորական կուսակցությունը (PKK) վայր դնի զենքը և դադարեցնի իր գործունեությունը.
«Այդ հարցում Բյուլենթ Արընչի որոշումը դատական որոշում չէ, նա լիազորված չէ այդպիսի հայտարարություն անելու: Պարոն Արընչը ներկայացնում է կառավարությունը և ոչ թե դատարան: Գոյություն ունի դատարանի որոշում՝ ցմահ ազատազրկում: Ես՝ որպես կառավարության ղեկավար, ողջ պատասխանատվությամբ հայտարարում եմ, որ մենք որևէ խորհրդակցություն չենք անցկացրել կամ որևէ բանակցություն չենք վարել Բյուլենթ Արընչի արած հայտարարության կապակցությամբ: Դա կարող է լինել միայն Արընչի անձնական կարծիքը, որ զենքը վայր դնելու դիմաց Օջալանին կարող է տրվել տնային կալանք»:
Հիշեցնենք, որ Արընչի այդ հայտարարությունից հետո ընդդիմադիր Ժողովրդա-հանրապետական կուսակցությունը (ԺՀԿ) Էրդողանի կառավարությանը մեղադրել էր ազգային դավաճանության մեջ, իսկ «Ազգայնական շարժում» կուսակցությունը (ԱՇԿ) իր համակիրներին փողոցային ակցիաներ կազմակերպելու կոչ էր արել:
