Երևան-Մեղրի միջպետական ճանապարհի Սիսիան-Գորիս հատվածը արդեն երկրորդ օրն է՝ շարունակում է փակ մնալ: Կիրակի` փետրվարի 6-ին, ժամը 4-ից ուժեղ ձնաբքի պատճառով այստեղ երթևեկությունը գրեթե անհնարին է դարձել: Ժամը 17-ի սահմաններում հնարավոր է եղել վերականգնել միակողմանի երթևեկությոնը, սակայն հետո ճանապարհը նորից ամբողջովին փակվեց: Ճանապարհի այս հատվածում տեղումներ չկան, սակայն ուժեղ քամին ճամփեզրի ձյունը շարունակ լցնում է մայրուղի: Արդյունքում, ձյան շերտի հաստությունը տեղ-տեղ գերազանցում է մեկուկես մետրը: Ճանապարհը սպասարկող Գորիսի «Ոսմար» ընկերության ողջ տեխնիկան աշխատում է այդ հատվածում, անընդհատ մաքրվում է ճանապարհը, բայց ապարդյուն:
Առայժմ ճանապարհաշինարարներին չի հաջողվում երթևեկելի դարձնել ճանապարհահատվածը: Ճանապարհին կանգնած մեքենաների ուղևորներին տեղափոխել են Գորիս: Հիշեցնենք, որ մայրուղու այս հատվածում ձնամրրիկը սկսվել է կիրակի առավոտյան` ժամը 4-ից: Այս պահի դրությամբ Գորիսում և Սիսիանի մոտ կուտակվել է մոտ 200 մեքենա: Ճանապարհաշինարարների խոսքով, առաջիկա ժամերին հնարավոր չի լինի բացել մայրուղին:
Ի դեպ, մայրաքաղաքի բուհերի կապանցի ուսանողները, ովքեր արձակուրդին տուն էին գնացել, չեն կարողացել երեկ տեղ հասնել: Նրանք վերադարձել են Կապան ու հիմա չգիտեն` ի՞նչ տեղեկանք են ներկայացնելու, որ բացակայությունը հարգելի համարվի:
Մեր ունեցած տեղեկություններով, Կապանի «Գանձասար» ֆուտբոլային թիմը, որը պետք է մեկներ Անթալիա ուսումնամարզական պարապմունքների ևս մնացել է բքի տակ:
