Թուրքական Milliyet թերթի փոխանցմամբ՝ Հայոց ցեղասպանության փաստը ճանաչած թուրք առաջին պատմաբաններից Թաներ Աքչամը ԱՄՆ նախագահ Բարաք Օբամային ու Եվրոպային կոչ է արել ճանաչել 1915 թվականին Օսմանյան կայսրությունում իրականացված Հայոց ցեղասպանությունը:
Աքչամն իր այդ կոչը հնչեցրել է Վաշինգտոնում Միջազգային քրիստոնեական համերաշխության կազմակերպության միջոցառման ժամանակ: Աքչամն ընդգծել է, որ ԱՄՆ-ի ու եվրոպական երկրների կողմից Հայոց ցեղասպանության ճանաչումը կնպաստի նրան, որ Թուրքիան Գերմանիայի օրինակով (Հոլոքոսթի ճանաչման պլանում) կկարողանա իր մեջ քաջություն գտնել՝ պատասխան տալու կատարված հանցանքների համար:
Հիշեցնենք, որ այս տարվա մարտի կեսերին Աքչամը հայտարարել էր, որ 2015 թվականին Օբաման կարտաբերի «Ցեղասպանություն» եզրույթը: Իսկ ավելի վաղ Թաներ Աքչամը հայտարարել էր. «Հայոց ցեղասպանությունն իսկական Ցեղասպանություն է, այլ ոչ թե ջարդ, սպանություն կամ այլ բան: Ես կասեի՝ եթե 1915-ին տեղի ունեցածը Ցեղասպանություն չանվանենք, այդ դեպքում պետք է ասել, որ որևէ ցեղասպանություն չի եղել աշխարհում: Սա է իմ տրամաբանությունը՝ իրերը պետք է կոչվեն իրենց անուններով, որպեսզի կարողանանք ճիշտ վերաբերվել դրանց»։
