Կանադայում կայացած «Սառցե» միջազգային փառատոնից վերադարձած քանդակագործ Հայկ Թոքմաջյանը իր տպավորություններով կիսվեց լրագրողների հետ:
Փառատոնի առաջին մասը տեղի է ունեցել հունվարի 13-19-ը` Կանադայի Էդմոնտոն քաղաքում: 130 աշխատանքներից ընտրվել է 9-ը, այդ թվում` «Կարուսելը»: Երկրորդ մասը տեղի է ունեցել հունվարի 21-24-ը` Լեյքլուիզել ավանում:
Տարածաշրջանից մասնակցել է միայն Հայաստանը: Ռուսաստանը ներկայացնում էին Յակուտիայից: Հայաստանն առաջին անգամ է ներկայանում սառցե այդ միջազգային փառատոնին: Հայկ Թոքմաջյանը Հայաստանը ներկայացնում էր եղբոր հետ, ով բնակվում է Կանադայում:
«Ես ու եղբայրս թիմ էինք, և մեր թիմն անվանել էինք «Արարատ»: Առաջին գործը, որ ներկայացրինք, կոչել ենք «Կարուսել»: Քարից հետո առաջին անգամ էի սառույցի հետ աշխատում, բայց ոչ մի խոչընդոտ չառաջացավ, չնայած սառույցը կամակոր է և քմահաճ»,- ժպիտով նշեց քանդակագործը: Սառցե15 կտորներից քանդակագործները պետք է մեկ ամբողջական կտոր ստանային, որից էլ պատրաստեին իրենց աշխատանքը. «Մի փոքր դժվարություն առաջացրեց ցուրտը, որովհետև -30 աստիճանի պայմաններում պետք է արվեստի գործ ստեղծեինք երեք օրում, բայց ցուրտն էլ չխանգարեց, որպեսզի մենք ապրենք անփոխարինելի զգացողությունը: Կարծես ապակու կամ ադամանդի հետ աշխատեինք»:
Քանդակագործը եղբոր հետ մասնակցել է «Ծովերի թագուհի» փառատոնին ևս: «Այստեղ մի փոքր ամերիկյան ազդեցություն կար. ամերիկյան թիմեր, ամերիկյան ժյուրի: Մասնակիցների ընտրության կարգն այսպիսին էր. նախապես ներկայացնում ես քո աշխատանքի էսքիզները, որից հետո ժյուրին ընտրություն է կատարում»,- տեղեկացրեց Հայկ Թոքմաջյանը:
Թոքմաջյանը ցանկություն հայտնեց, որ նման փառատոններ կազմակերպվեն նաև Հայաստանում, որպեսզի մենք ևս ականատես լինենք «Սառցե թագավորության» հրաշքին:
