Փետրվարի 4-ին Շվեյցարիայում Հայաստանի դեսպան Շառլ Ազնավուրը հանդիպել է Ժուրա կենտրոնի նահանգների խորհրդական (Conseiller aux Etats), Ժուրա կանտոնի և հանրապետության նախկին նախարար, «Սեմրա» (Semra) հիմնադրամի նախագահ Կլոդ Հեշի և նույն հիմնադրամի փոխնախագահ Ժան-Պիեռ Բեռնհարդի հետ:
Հանդիպման ընթացքում քննարկվեցին Ժուրա կանտոնի կողմից հիմնադրամի միջոցով Հայաստանում երեխաների աջակցության ծրագրերի ընթացքը, կանտոնի առողջապահության, համագործակցության և կրթության ծառայությունների և Երևանի մանկաբուժության կենտրոնի, ինչպես նաև «Սեմրա» հիմնադրամի և Երևանի «Արաբկիր» բժշկական կենտրոնի միջև համագործակցության ուղղությունները: Հանդիպման ընթացքում դեսպան Ազնավուրը կարևորեց Ժուրա կանտոնի կողմից Հայաստանի երեխաներին ցուցաբերվող օժանդակության շարունակումը և ընդլայնումը:
«Սեմրա» հիմնադրամը ստեղծվել է 1988թ. երկրաշարժից հետո` դրսևորելով Շվեյցարիայի համերաշխությունը հայ ժողովրդին և արդեն ավելի քան 20 տարի պարբերական ֆինանսական աջակցություն է ցուցաբերում Հայաստանում մանկական առողջապահական ծրագրերին: