Չի կարելի միանշանակ պնդել, թե Հայաստանում ռուսական ռազմաբազայի մարտական ուղղաթիռների 20 տոկոսով ավելացած թռիչքները նշան են այն բանի, որ Ռուսաստանը կարող է ցանկացած պահի միջամտել Հայաստանի և Ադրբեջանի սահմանի մոտ տեղի ունեցող հարձակումներին: «Առաջին լրատվական»-ի հետ զրույցում նման տեսակետ հայտնեց «Քաղաքական ու միջազգային հետազոտությունների հայկական կենտրոնի» փորձագետ Ռուբեն Մեհրաբյանը՝ անդրադառնալով The New York Times–ի հրապարակմանը:
«Ռուսական մամուլում բազմիցս ենք հանդիպել նյութերի, որ պրոֆեսիոնալիզմի պահպանման նպատակով ռուս օդաչուները պետք է թռիչքների նորմատիվային մինիմում ապահովեն: Ես ավելի շատ հակված եմ կարծելու, որ անցած տարվա համեմատ 20 տոկոսով ավելացած թռիչքները զուտ տեխնիկական նշանակություն ունեն»,- ասաց նա:
Ռուբեն Մեհրաբյանի խոսքերով՝ հենց Ամերիկայի Միացյալ Նահանգներն է The New York Times-ի միջոցով փորձում մեսիջներ հղել Ադրբեջանին, և պարբերականը, թեկուզ վկայակոչելով ռուսական բանակի գնդապետ Իգոր Գորբուլին, ԱՄՆ-ի կողմից հասկացնում է, որ միջազգային հանրությունը կտրականապես դեմ է ադրբեջանական գլխավոր շտաբի կամ նախագահի աշխատակազմի հիվանդ ուղեղներում ծագած ԼՂ խնդրի կարգավորման ռազմական ցանկացած սցենարի: «Սա Բաքվի բոնապարտիզմի վրա մեկ դույլ սառը ջուր լցնել է, տաք գլուխները հովացնելու ևս մեկ PR միջոցառում: Կարծում եմ՝ ադրբեջանական կողմը պնդաճակատ չի գտնվի և կհասկանա, որ մարտական գործողությունների ծավալումը խնդրի լուծման բոլոր տարբերակներից դուրս տարբերակ է»,- ասաց Ռուբեն Մեհրաբյանը:
Նշենք, որ The New York Times-ը հաղորդում է, որ բանակի ներկայացուցիչ, գնդապետ Իգոր Գորբուլն Interfax լրատվական գործակալությանը ասել է, որ ռուսական մարտական ուղղաթիռները, որոնք գտնվում են Հայաստանի ռազմական բազայում, 300 ուսումնական թռիչքներ են իրականացրել 2012-ի սկզբից ի վեր, և թռիչքների ժամանակն անցած տարվա համեմատ ավելացրել են 20 տոկոսով:
Բանակի ներկայացուցիչը շաբաթ օրն ասել է, որ Ռուսաստանի մարտական ուղղաթիռներն իրականացնում են ավելացող քանակով թռիչքներ Հայաստանի վրայով` այդ կերպ հստակորեն զգուշացնելով, որ Ռուսաստանը կարող է միջամտել ցանկացած պահի, եթե Հայաստանի և Ադրբեջանի սահմանի մոտ հարձակումները շարունակվեն:
