ԱԺ հասարակայնության և տեղեկատվության միջոցների հետ կապերի վարչությունը տեղեկացնում է, որ ՀՀ Ազգային ժողովի նախագահ Հովիկ Աբրահամյանը հունիսի 9-ին ընդունեց ԳԴՀ Բունդեսթագի արտաքին հարաբերությունների հանձնաժողովի նախագահ Ռուպրեխտ Պոլենցին: Հանդիպմանը ներկա էին ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը, Հայաստան-Գերմանիա բարեկամության խմբի ղեկավար Արտակ Դավթյանը:
ԱԺ նախագահը գոհունակությամբ փաստեց, որ վերջին տարիների ընթացքում հայ-գերմանական քաղաքական երկխոսությունը և փոխգործակցությունը ձեռք են բերել դինամիկ բնույթ: «Հայաստանը կարևորում է Գերմանիայի հետ հարաբերությունների զարգացումը թե երկկողմ և թե բազմակողմ ձևաչափերով: Հայ-գերմանական համագործակցությունը մենք դիտում ենք որպես կարևոր բաղադրիչ Հայաստանի եվրաինտեգրման քաղաքականության ընդհանուր համատեքստում` հաշվի առնելով Գերմանիայի ծանրակշիռ դերը Եվրամիության կառույցներում»,-նշեց պարոն Աբրահամյանը: ԱԺ նախագահի համոզմամբ` երկու երկրների միջև հարաբերությունների սերտացման գործում մեծ դեր է վերապահված խորհրդարաններին և այդ համատեքստում կարևորվեց միջխորհրդարանական կապերն աշխուժացնելու, պատգամավորական բարեկամության խմբերի աշխատանքներն ակտիվացնելու անհրաժեշտությունը, միջազգային կազմակերպություններում երկուստեք հետաքրքրություն ներակայացնող հարցերի շուրջ համագործակցությունը: ԱԺ նախագահի խոսքով ` Հայաստանը մեծապես շահագրգռված է Գերմանիայի հետ առևտրատնտեսական կապերի շարունակական զարգացմամբ ու խորացմամբ:
Ռուպրեխտ Պոլենցը շնորհակալություն հայտնեց ջերմ ընդունելության համար և շնորհավորեց Հովիկ Աբրահամյանին ԱԺ նախագահ վերընտրվելու կապակցությամբ: Նա նույնպես կարևորեց հայ-գերմանական հարաբերությունների էլ ավելի զարգացումը և խորացումը:
Հանդիպման ընթացքում անդրարդարձ եղավ տարածաշրջանային խնդիրներին, ԼՂ հակամարտության կարգավորմանը և հայ- թուրքական հարաբերություններին: ԱԺ նախագահը նշեց, որ Հայաստանը բազմիցս հայտարարել է, որ ղարաբաղյան հիմնախնդիրը պետք է կարգավորվի միայն ԵԱՀԿ Մինսկի խմբի ձևաչափում, խաղաղ բանակցային ճանապարհով և հավատարիմ է իր այդ դիրքորոշմանը: Պարոն Պոլենցի համոզմամբ նույնպես հիմնախնդիրը պետք է կարգավորվի Մինսկի խմբի շրջանակում:
Հանդիպմանը քննարկվեցին երկկողմ հետաքրքրություն ներկայացնող այլ հարցեր ևս: