Ազգային պատկերասրահի տնօրեն Փարավոն Միրզոյանը կառավարությունից և Մշակույթի նախարարությունից ստացված բանավոր հրահանգի համաձայն` պատկերասրահի աշխատակազմը երիտասարդացնելու համար աշխատանքից հեռացվել են պատկերասրահի գիտական գծով փոխտնօրեն Հասմիկ Հարությունյանին և գեղանկարի բաժնի վարիչ Արմեն Գասպարյանին:
«Առաջին լրատվականի» հետ զրույցում պատկերասրահի տնօրեն Փարավոն Միրզոյանը պարզաբանեց և ասաց, որ այդ լուրերը շատ սխալ են.
«Ես կարող եմ ասել, որ Հասմիկ Հարությունյանն ազատվել է աշխատանքից` իր դիմումի համաձայն: Նա շատ կարևոր դիրք զբաղեցնող մի արվեստաբան է, ով հիվանդության պատճառով դիմում է գրել և ազատվել: Ես նրան առաջարկել եմ ավելի թեթև աշխատանք, բայց նա չի համաձայնել:
Իսկ Արմեն Գասպարյանը չի ազատվել աշխատանքից. նա մեր լավագույն արվեստաբաններից մեկն է: Մենք իրար հետ քննարկել ենք, որ իր ստեղծագործական կյանքին խանգարում էր այդ ադմինիստրատիվ աշխատանքը: Մեր երկուսի համաձայնությամբ նա մնացել է գեղանկարի բաժնում` որպես կարևոր գիտաշխատող:
Իսկ ինչ վերաբերում է նրան, թե իբր նախարարությունից եմ հրահանգ ստացել, դրանք լրիվ սխալ կարծիքներ են, բամբասանքներ: Ես տարիների ընթացքում ինքս նայել եմ, որ պատկերասրահի աշխատողները պետք է երիտասարդներ լինեն: Իսկ ես այստեղ, ում որ նշանակել եմ բաժնի վարիչ կամ աշխատակիցներ, նրանք փորձառու գիտաշխատողներ են: Նման հրահանգ ինձ չի եղել»:
Փարավոն Միրզոյանը պատկերասրահի գիտական գծով փոխտնօրենի պաշտոնի համար դեռ հարմար թեկնածու չի տեսնում: Նա կարծում է, որ դա հեշտ գործ չէ.
«Մենք դեռ մտածում ենք և ուզում եմ չշտապել: Դա այնպիսի բարդ աշխատանք է, որ կոլեկտիվը պետք է ընկալի այդ մարդուն: Էնպես չի, որ դրսից որևէ մեկին կանչես, պետք է լինի պատկերասրահի աշխատակից: Գիտեք, հետո պրոբլեմ պետք չէ բարձրացնել, որովհետև ամեն մի աշխատանքի մեջ ոչ մեկը չի գալիս փորձառու»:
«Ես կաշխատեմ այնքան, որքան կկարողանամ: Իհարկե ոչ մի պաշտոնանկություն կամ նույնիսկ եթե ես հեռանամ ազգային պատկերասրահից, դա չի նշանակում, որ ես դադարում եմ արվեստաբան լինելուց և մտածելուց արվեստաբանի նման և իմ հոդվածները գրելուց: Ես երբեք չեմ հեռանա պատկերասրահից, ես այստեղ աշխատում եմ 20 տարեկանից և արդեն հազար տարեկան եմ ու երբեք չեմ աշխատել պատկերասրահում` նպատակ ունենալով դառնալ գեղանակարի բաժնի վարիչ կամ տնօրեն կամ մշակույթի նախարար:
Ես սիրում եմ իմ աշխատանքը և այդ առումով աշխարհի ամենահարուստ մարդն եմ: Տվյալ դեպքում ոչ թե սերնդափոխության խնդիրն է, այլ զբաղվածության խնդիրը: Ես հիմա ավելի շատ ժամանակ ունեմ զբաղվելու գեղանկարի խնդրով հայ գեղանկարչության մեջ:
Նկարիչ և արվեստաբան հարաբերությունները ինչպես կային, այնպես էլ մնում են. տնօրեն և աշխատակից հարաբերությունները ինչպես կոկիկ եղել են, այդպես կան և էդպես էլ կմանան»,- այսպես մեկնաբանեց իր պաշտոնանկությունը գեղանկարի բաժնի արդեն նախկին վարիչ Արմեն Գասպարյանը:
Իսկ գեղանկարի բաժնի վարիչ է նշանակվել արվեստաբան Լիլիթ Սարգսյանը, ով պատկերասրահում երբեք չի աշխատել:
Մենք փորձեցինք պարզել նաև, թե այս հարցի շուրջ ինչ են մտածում մշակույթի նախարարությունում: Մշակույթի նախարարության հասարակայնության հետ կապերի բաժնի պետ Գայանե Դուրգարյանն ասաց, որ մշակույթի նախարարությունը չի տնօրինում ՊՈԱԿ-ի կադրերին, նախարարությունը կարող է տնօրինել ՊՈԱԿ-ի տնօրենի հաստիքը, բայց ոչ երբեք ՊՈԱԿ-ի աշխատակիցների.
«Ազգային պատկերասրահի հաստիքները տնօրինում է պատկերասրահի տնօրենությունը և տնօրենը, իրենք են իրենց նկատառումներով, ելնելով կադրային իրենց քաղաքականությունից, նշանակում կամ ազատում: Դրա հետ նախարարությունը որևէ կապ չունի: Ես նման հրահանգ չեմ լսել, տեղեկություն չունեմ»: