Փետրվարի 2-ին ՀՀ Ազգային ժողովի նախագահ Հովիկ Աբրահամյանն ընդունեց ՀՀ-ում Հունգարիայի Հանրապետության դեսպան Գաբոր Շագիին:
Ողջունելով դեսպանին` ԱԺ նախագահը նշեց, որ հայ և հունգար ժողովուրդների բարեկամությունն ու համագործակցությունը դարերի պատմություն ունի, ինչը լավ հիմք է ստեղծում տարբեր ոլորտներում փոխշահավետ համագործակցություն համար:
Նա ընդգծեց, որ հայ-հունգարական հարաբերությունները զարգացման մեծ ներուժ ունեն և կարևորեց տարբեր ուղղություններով գործնական քայլեր ձեռնարկելու անհրաժեշտությունը: Հովիկ Աբրահամյանը գոհունակությամբ փաստեց, որ վերջին մի քանի տարիների ընթացքում նկատելի զարգացումներ են արձանագրվում երկկողմ հարաբերություններում, ինչին մեծապես նպաստեց 2009 թ. ՀՀ նախագահ Սերժ Սարգսյանի Բուդապեշտ կատարած այցը:
ԱԺ նախագահը վստահություն հայտնեց, որ Հայաստանը և Հունգարիան կարող են արդյունավետ համագործակցել ԵՄ արևելյան գործընկերության շրջանակներում` այս համատեքստում կարևորելով 2011 թ. առաջին կիսամյակում ԵՄ-ում Հունգարիայի նախագահությունը:
ԱԺ նախագահը կարևորեց միջխորհրդարանական կապերի ակտիվացումը, փոխայցերը, միջազգային կառույցներում համագործակցության խորացումը:
Շնորհակալություն հայտնելով ընդունելության համար` դեսպանը բարձր գնահատեց ՀՀ նախագահի այցը Հունգարիա և կարևորեց երկկողմ կապերի հետագա զարգացումը:
Հանդիպմանը կողմերը անդրադարձան տարածաշրջանային խնդիրներին: ԱԺ նախագահը ողջունեց Հունգարիայի` Հարավային Կովկասի երկրների հանդեպ որդեգրած հավասարակշռված քաղաքականություն վարելու ուղեգիծը:
Նա կարևորեց ԼՂ հիմնախնդրի խաղաղ կարգավորմանն ուղղված ԵԱՀԿ Մինսկի խմբի գործունեությունը և անթույլատրելի համարեց այլ ձևաչափեր հարցը տեղափոխելը, ինչը կարող է վտանգել խաղաղ բանակցությունների ընթացքը:
Այս համատեքստում Հովիկ Աբրահամյանն իր մտահոգությունն արտահայտեց ԵԽԽՎ-ում ԼՂ հակամարտության կարգավորման հարցով ենթահանձնաժողովի աշխատանքների վերսկսման առնչությամբ, որի գործունեությունը ժամանակին դադարեցվել էր անօգտակարության պատճառով: ԱԺ նախագահի համոզմամբ ենթահանձնաժողովի գործունեությունը կխոչընդոտի Մինսկի խմբի աշխատանքներին:
Դեսպանը ողջունեց Հայաստանի ջանքերը ԼՂ հակամարտությունը խաղաղ բանակցային ճանապարհով կարգավորելու ուղղությամբ և ընդգծեց, որ Հունգարիան նույնպես գտնում է, որ հարցի կարգավորման միակ գործուն ձևաչափը ԵԱՀԿ Մինսկի խումբն է:
Պարոն Շագին ՀՀ ԱԺ նախագահ Հովիկ Աբրահամյանին փոխանցեց Հունգարիա այցելելու Հունգարիայի խորհրդարանի նախագահի պաշտոնական հրավերը:
Հանդիպմանը քննարկվեցին երկկողմ հետաքրքրություն ներկայացնող այլ հարցեր ևս:
