Ռուսական Regnum լրատվական գործակալության փոխանցմամբ՝ Վրաստանի նախագահ Միխեիլ Սաակաշվիլին երեկ դասախոսություն է կարդացել Ռիգայի համալսարանում Վրաստանի արտաքին քաղաքականության և երկրի հեռանկարների վերաբերյալ.
«Եթե Վրաստանը հարձակվել է Ռուսաստանի վրա, ապա այդ դեպքում Լեհաստանն է սկսել Երկրորդ համաշխարհային պատերազմը: «Պարզվել է», որ Երկրորդ համաշխարհային պատերազմը սկսել են լեհերը, որոնք հիմարաբար հարձակվել են Գերմանիայի տարածքում գտնվող ռադիոկայանի վրա, իսկ սահմանի մոտ գերմանական զորքերը զորավարժություններ էին անցկացնում և պատասխանեցին լեհերի հարձակմանը՝ օկուպացնելով Լեհաստանը:
Այսպիսի համընկնում տեղի ունեցավ նաև ռուս-վրացական պատերազմի սկզբին, երբ «խենթ վրացիները» հարձակվեցին, իսկ Ռուսաստանը տվյալ ժամանակ պատահաբար զորավարժություններ էր անցկացնում: Ճիշտ այնպես, ինչպես Երկրորդ համաշխարհային պատերազմի սկսվելու դեպքում լեհերի պարագայում էր:
Երբեք լուրջ մի վերաբերվեք նրան, ինչ ասում են ռուսները: Ռուսաստանի նախագահ Վլադիմիր Պուտինը bull shit (ամեն տիպի անհեթեթություն) է տարածում մեր միջև առկա հակակրանքի մասին, սակայն իրականում ցանկանում է վերահսկել ռազմավարական նշանակություն ունեցող երկիրը»:
Հիշեցնենք, որ Սաակաշվիլին երկօրյա այցով Լատվիա է մեկնել մայիսի 29-ին: