Իրանը Պարչինում միջուկային օբյեկտում հավանաբար անցկացնում է մաքրման աշխատանքներ: Ինչպես հաղորդում են ինտերնետ-ԶԼՄ-ները, այդ մասին վկայում են նոր արբանյակային լուսանկարները:
ԱԷՄԳ–ի փորձագետները նշել են, որ մայիսի 25-ին արված լուսանկարների հետ համեմատելով՝ կարելի է տեսնել, որ օբյեկտի վրայից հանվել է շինություններից մեկը: ԱԷՄԳ-ում կասկածում են, որ Պարչինի օբյեկտում ակտիվությունը կարող է Թեհրանի կողմից նախկինում արված հետազոտությունների հետքերը թաքցնելու փորձ լինի:
Հիշեցնենք, ավելի վաղ միջազգային գործակալությունները հրապարակել էին ԱՄՆ ազգային անվտանգության ինստիտուտի ներկայացուցիչների գնահատականը, որի համաձայն՝ Իրանը զգալիորեն ակտիվացրել է ցածր հարստացված ուրանի արտադրությունը, և արտադրված վառելիքի ընդհանուր ծավալը բավարար է առնվազն 5 միջուկային ռումբ ստեղծելու համար:
Նման եզրակացություններ գիտնականները արել են ԱԷՄԳ-ի եռամսյակային հաշվետվությունների հիման վրա: Դրանցում նշվում է, որ Իրանն ուրանի հարստացման գործում առաջ է շարժվում` խախտելով ՄԱԿ–ի բանաձևը, որը Թեհրանին կոչ է անում դադարեցնել միջուկային գործունեությունը:
