ՀՀ մշակույթի նախարարության «Մշակութային կրթության աջակցության» հիմնադրամը տեղեկացնում է, որ հունիսի 2-ին, 3-ին և 4-ին Համազգային պետական թատրոնում կանցկացվի «Հազարան բլբուլ» մանկապետանեկան երաժշտական բեմադրությունների մրցույթ-փառատոնի երկրորդ փուլը: Փառատոնի առաջին փուլն անցկացվել է մայիսի 14-30-ին Երևանում, մարզերում և Արցախում: Պրոֆեսիոնալ ժյուրին ընտրել է ներկայացրած 26 երաժշտական բեմադրություններից լավագույն 10-ը, որոնք կմրցեն 5 մրցանակային հորիզոնականները զբաղեցնելու համար:
Մանկապատանեկան երաժշտական մրցույթ-փառատոնն առաջին անգամն է անցկացվում Հայաստանում: Այն նպատակ ունի բարձրացնելու Հայաստանում և Արցախում բնակվող երեխաների գեղագիտական ճաշակը, նրանց մոտեցնելու արվեստին: Այս փառատոնը նպաստեց, որ 625 երեխաներ իրենց կարողությունները փորձեն երգարվեստում, թատերարվեստում և պարարվեստում: Փառատոնին մասնակցել են ինչպես արվեստի և երաժշտական կրթօջախների սաները, այնպես էլ հանրակրթական դպրոցների աշակերտները, որոնցից երկուսն անցել են երկրորդ փուլ:
Փառատոնի հեղինակ Նաիրա Ներսիսյանը նշում է, որ իրենք չէին ակնկալում, թե մեր պատանիներն ու երեխաները կարող էին այսքան լավ հանդես գալ բեմում. «Երեխաները և երգում են, և խաղում են, և պարում են, հիանալի շոու է սպասվում մեզ»:
Երկրորդ փուլում հաղթած խմբերը հունիսի 7-ին` ժամը 14:00-ին, հանդես կգան եզրափակիչ գալա համերգում, որը տեղի կունենա Հ.Պարոնյանի անվան երաժշտական կոմեդիայի պետական թատրոնում: Հաղթողներին որպես մրցանակ կհանձնվեն Գուրգեն Գադաչիկի հեղինակային աշխատանքները:
Անկախ մրցույթի արդյունքներից` փառատոնը մեծ ոգևորություն է առաջացրել ամբողջ Հայաստանի և Արցախի տարածքում. «Որոշ տեղերում հատուկ նոր մյուզիքլներ են գրվել այս մրցույթի համար, այնպես որ լինելու են նաև պրեմիերաներ»,- ասում է հիմնադրամի նախագահ Նելլի Սարգսյանը:
Մրցույթ-փառատոնն անցկացվում է «Մշակութային կրթության աջակցության» հիմնադրամի կողմից` ՀՀ մշակույթի նախարարության ֆինանսավորմամբ: