Գյումրիում, մեր աղբյուրների փոխանցմամբ, կենսաթոշակների, նպաստների և աշխատավարձերի ուշացման պատճառով բազմաթիվ բնակիչներ հոսանքազրկվել են։
Բնակիչները դիմել են էլեկտրացանցերին՝ խնդրանքով, որ ընդառաջեն և հոսանքը միացնեն մինչև թոշակ, նպաստ կամ աշխատավարձ ստանալը։ Մանավանդ որ, պետության տված գումարների վրա դեռ մի բան էլ ավելացնում են, որ այդ պարտքերը մարեն։
«Պետության տված գումարները ոչ ուտում ենք, ոչ խմում, կոպեկ-կոպեկ էլի իրենց գրպանն ենք լցնում։ Այսինքն՝ մի ձեռքով պետությունից ստանում ենք, մյուսով էլի պետության գրպանն ենք դնում»,- դժգոհեց հոսանքազրկված բնակիչներից Արսենը։
Այնուամենայնիվ, էլցանցերում բնակիչների խնդրանքին չեն ընդառաջել և լույսերը չեն միացրել, մինչև մարդիկ գումարի ճար չեն տեսել։
Բայց քանի որ Գյումրին փոքր է, և բոլորը բոլորին ճանաչում են, էլեկտրիկները որոշել են «վատամարդ» չմնալ` ձմռան ցրտին թողնելով բնակիչներին և որոշել են ինքնուրույն այդ գումարները հայթայթել և բնակիչների պարտքը մարել, մինչև երկուշաբթի օրը բնակիչները թոշակ ստանան։ Բայց արդյունքում այսօր չորեքշաբթի է, իսկ բնակիչները դեռ թոշակ, նպաստ և աշխատավարձ չեն ստացել։