Ընտանիքի հանդեպ պատասխանատվության գիտակցում, անձնական տնտեսությունը զարգացնելու մեծ ցանկություն, աշխատասիրություն, խնայողություն ամեն ինչում, սթափություն և բարեխղճություն աշխատանքում. այս հատկանիշներն են, որ առ այսօր պահպանել են մոլոկաններին և թույլ տվել օտար երկրի տարածքում բավականին արագ տնտեսության տեր դառնալ ու ստեղծել ամուր, բազմազավակ ընտանիքներ:
Մոլոկանները ռուսներ են, որոնք ռուսական օրթոդոքս եկեղեցուց անջատվել են 17-րդ դարում։ Նրանց նախնիները ծագում են ռուս գյուղացիությունից և Ռուսաստանի կայսրության որոշ ազգություններից: Իրենց դավանանքով վաղեմի ժամանակներից նրանք պատկանել են հունառուսական եկեղեցուն, թեև իրենց ներքին համոզմունքով չեն ընդունում մարդու կողմից ստեղծված սրբապատկերի կամ խաչի երկրպագումը, դա կռապաշտություն են համարում, իսկ իրենք դավանում են կենդանի մարդու հոգում ապրող ամենազոր Աստծուն: Այս հավատացյալներին սկզբնապես պաշտոնապես անվանել են պատկերամարտներ, սակայն հետագայում, երբ ձևավորվեցին այդ հոսանքի առանձին համայնքները, նրանց սկսեցին անվանել մոլոկաններ` պասի օրերին առավելապես կաթ օգտագործելու համար:
Ամբողջ Հայաստանի տարածքում այժմ ապրում է 5000 մոլոկան, որոնց մեծ մասը բնակվում է Երևանում (մոտ 2000 մարդ)։ Փոքրաթիվ մոլոկաններ ապրում են Վանձորում, Դիլիջանում, Հրազդանում և Սևանում, որտեղ զբաղված են հիմնականում շինարարության մեջ, կոմունալ տնտեսության մեջ, օժանդակ աշխատանքներում և այլն:
Իսկ Հայաստանում նախկինում եղած երկու տասնյակ ռուսական գյուղերից ներկայումս մնացել են ընդամենը երկուսը` Ֆիոլետովոն և Լերմոնտովոն, այն էլ՝ վերջինի բնակիչների կեսն արդեն հայեր են: Ֆիոլետովոյում այժմ ապրում է 1500 մոլոկան, իսկ Լերմոնտովոյում՝ շուրջ 800:
