Ռուսաստանում ահաբեկչական գործողություններ իրականացնելու և նախապատրաստելու մեղադրանքով ձերբակալվածների վկայությունների համաձայն` ահաբեկիչները պլանավորել էին պայթյուն իրագործել Նոր տարվա տոների ժամանակ: Այս մասին հայտնում են ռուսական հետախուզական աղբյուրները:
«Ծրագրված էր, որ կին մահապարտը դեկտեմբերի 31-ին ահաբեկչական գործողություն իրագործեր Կարմիր հրապարակում: Ուժայինների գալուց հետո պետք է իրականացվեր երկրորդ պայթյունը»,- ասում է հետախուզական բաժնի աշխատակիցը:
Աղբյուրը հաստատում է նաև, որ այս ահաբեկչական խումբը չի կազմակերպել հունվարի 24-ի ահաբեկչական գործողությունը «Դոմոդեդովո» օդանավակայանում:
Մենք տեղեկացրել էինք, որ հունվարի 31-ի պայթյունը տեղի է ունեցել «Ռազմա-որսորդական հասարակության սպորտահրաձգային ակումբի» հյուրանոցային համարում՝ Մոսկվայի Գոլովաչևա փողոցի վրա: Մահացել է մի կին, որը ահաբեկիչ մահապարտներից մեկն էր:
Գործի առնչությամբ չորս կասկածյալ արդեն ձերբակալվել են:
Ռուսաստանի քննչական կոմիտեի ներկայացուցիչ Վլադիմիր Մարկինի խոսքով` հայտնի են ահաբեկչական ակտի բոլոր կազմակերպիչները, նրանցից մի քանիսը հետախուզման մեջ են:
