Al-Jazeera-ի փոխանցմամբ, երկրի ողջ տարածքում պարետային ժամ է մտցվել: Այս մասին քիչ առաջ հայտարարեց պետական հեռուստաընկերությունը: Սակայն հասկանալի չէ, թե իշխանությունները վերահսկո՞ւմ են իրավիճակը, թե՞ ոչ: Հայտնի է, որ Սուեզի ջրանցքի երկայնքով գտնվող քաղաքներում ցուցարարները վերահսկում են իրավիճակը, քանի որ Al-Jazeera-ի ուղիղ եթերում ցուցադրվող կադրերը փաստում են, որ ցուցարարները լուրջ դիմադրություն են ցույց տալիս, և ոստիկանությունը ի վիճակի չէ վերահսկողություն հաստատել երկրի մայրաքաղաքում:
Նույն հեռուստաընկերոթւայն փոխանցմամբ, երկրի նախագահ Հոսնի Մուբարաքը դիմելու է քիչ անց ժողովրդին: Հիմա երկրի փողոցներ են մտցվում զինվորական միավորումներ:
Իրավապահներն ասում են, որ Ալ-Բարադեին գտնվում է տնային կալանքի տակ: Նրան արգելվել է լքել իր բնակարանը: Այս մասին հաղորդում է Associated Press գործակալությունը:
Al-Jazeera-ն փոխանցում է, որ իրենց գրասենյակ են ներխուժել զինվորականներ, սակայն ուղիղ եթերն այս պահին շարունակվում է:
Բրիտանական աղբյուրները հաստատում են, որ Եգիպտոսի նախագահի որդին` Գամալ Մուբարաքը, գտնվում է Լոնդոնում:
Աշխարհում շատ մարդիկ իրենց համերաշխությունն են հայտնում եգիպտական ժողովրդին: Աջակցության ցույցեր են Ստամբուլում, Հորդանանի մայրաքաղաք Ամմանում, եվրոպական մայրաքաղաքներում տեղակայված Եգիպտոսի դեսպանատների և հյուպատոսությունների դիմաց:
Al-Misr Al-Youm-ը հայտնում է, որ Սուեզ քաղաքի մի մասն անցել է ցուցարարների վերահսկողության տակ:
CNN-ի փոխանցմամբ, քիչ առաջ ոստիկանության հետ բախումների ժամանակ մի կին է սպանվել:
Al-Jazeera-ի փոխանցմամբ, Ալեքսանդրիա քաղաքում ցուցարարներն իրենք են ձերբակալել ոստիկաններին, նրանց մեծ մասը ենթարկվել է դաժան ծեծի: