Ինչպես հայտնում է Reuters գործակալությունը, RIM ընկերությունը (BlackBerry սմարթֆոններ արտադրողը) հրաժարվել է Հնդկաստանի իշխանություններին տրամադրել իր սմարթֆոնների հաճախորդների որոշ տվյալներ:
RIM փոխնախագահ Ռոբերտ Քրոուն հայտնել է, որ ընկերությունը ֆիզիկապես չի կարող բացել հաճախորդների միջև էլեկտրոնային փոստի միջոցով նամակագրությունները: Բանն այն է, որ բոլոր նամակները, որոնք ուղարկվում են կամ էլ ստացվում BlackBerry սմարթֆոններից, փոխանցվում են կոդավորված ճանապարհով, իսկ հատուկ ծառայություններին չի հաջողվում վերծանել այդ կոդերը, եթե դրանց կարիքը լինում է:
Քրոուն ասել է, որ RIM-ը չունի ծածկագրերը, որոնք անհրաժեշտ են հաղորդագրությունների վերծանման համար: Մինչդեռ նա մանրամասնել է, որ նամակագրության մասին տեղեկությունների վերծանումը կարող են իրականացնել այն կազմակերպությունները և ծառայություններ մատակարարող ընկերությունները, որոնք տրամադրում են էլեկտրոնային փոստի ծառայությունը:
Հնդկաստանի իշխանությունների և կանադական RIM ընկերության միջև տարաձայնությունները սկսվել են 2010 թ. օգոստոսից: Այն ժամանակ երկրի իշխանությունները սպառնացել են կասեցնել BlackBerry-ի որոշ ծառայություններ, եթե օպերատորները հատուկ ծառայություններին չտրամադրեն տեղեկություններ սմարթֆոնների տերերի մասին: Նմանատիպ պահանջներով BlackBerry ընկերությանն են դիմել նաև ԱՄԷ-ի, Ինդոնեզիայի և Սաուդյան Արաբիայի իշխանությունները: