Հայ ազգային կոնգրեսը դժգոհ է խորհրդարանական ընտրությունների արդյունքներից, քանի որ համոզված է, որ որոշ կուսակցությունների ստացած քվեները հետևանք են համատարած ընտրակաշառքների: «Առաջին լրատվական»-ի հետ զրույցում նման տեսակետ հայտնեց Սոցիալ-դեմոկրատ հնչակյան կուսակցության ատենապետ, ՀԱԿ անդամ Լյուդմիլա Սարգսյանը:
«7 տոկոսը մեզ բացարձակ չի գոհացնում: Ինչպե՞ս կարող է հինգ տարի քաղաքական պայքար տարած ուժին այս թիվը գոհացնել, ուժին, որն այս տարիներին պայքարել է մարդկանց ազատ ընտրելու իրավունքի համար: Երեկվա ընտրությունները մեր պատմության մեջ ամենախայտառակ ընտրություններն էին, որովհետև ժողովրդին այն աստիճան աղքատության են հասցրել, որ մարդիկ պատրաստ էին ցանկացած ընտրակաշառք վերցնելու, միայն թե իրենց ընտանիքի խնդիրները լուծեին»,- ասաց նա:
Հարցին՝ ի՞նչ է այդ դեպքում պատրաստվում անել ՀԱԿ-ը, Լյուդմիլա Սարգսյանը նշեց, որ առայժմ ոչինչ չի կարող ասել: «Մենք դեռ որոշում չունենք, այս պահի դրությամբ քննարկումների փուլում ենք: Երբ ինչ-որ բան որոշենք, հանրությունն այդ մասին կիմանա»:
Հետաքրքրվեցինք՝ հնարավո՞ր է ընտրությունների արդյունքներից դժգոհ ՀԱԿ-ը վայր դնի խորհրդարանական մանդատները, ինչին ի պատասխան ՍԴՀԿ ատենապետը նշեց, որ մինչ այժմ նման քննարկում չի եղել:
