ԵԽԽՎ հայկական պատվիրակության անդամներն առայժմ չեն շտապում գնահատականներ տալ ԵԽԽՎ Մոնիտորինգի հանձնաժողովում Հայաստանի հարցով նոր համազեկուցողի՝ EPP խմբակցության անդամ, գերմանացի պատգամավոր Աքսել Ֆիշերի վերաբերյալ:
Գերմանացի պատգամավորի՝ Հայաստանի հարցով համազեկուցող ընտրվելը բավական ուշագրավ է. բանն այն է, որ Գերմանիան բավական հետևողական է Հայաստանում քաղբանտարկյալների խնդրի հանդեպ: Իսկ ՀՀ-ում Գերմանիայի դեսպան Հանս-Յոխեն Շմիդտը Երևանում անդրադարձել էր քաղբանտարկյալների խնդրին՝ հայտարարելով. «Դեսպանությունը հետաքրքրությամբ և ուշադրությամբ հետևում է 2008թ. մարտյան իրադարձությունների առնչությամբ ծավալվող զարգացումներին»:
Դժվար է, թերևս, միանշանակ ասել՝ հատկապես քաղբանտարկյալների հարցում որքանով կհամընկնեն ՀՀ-ում Գերմանիայի դեսպանի և ԵԽԽՎ-ում Հայաստանի հարցով համազեկուցողի դիրքորոշումները: Սակայն ԱԺ «Ժառանգություն» խմբակցության պատգամավոր, ԵԽԽՎ հայկական պատվիրակության անդամ Զարուհի Փոստանջյանը կարծում է, որ պետության քաղաքականությունը չպետք է կապել ԵԽԽՎ պատգամավորի դիրքորոշման հետ: «Ֆիշերը ներկայացված է ԵԽԽՎ Մոնիտորինգի հանձնաժողովի կողմից, հետևաբար այդ երկու փաստերն իրար հետ կապելը չեմ կարծում, որ տեղին է: Հարցը ոչ թե այդպես պետք է դրվի, այլ որ մենք ինքներս ենք կամովին անդամագրվել ԵԽԽՎ-ին, և ինքներս կամովին պետք է իրականացնենք մեր պարտավորությունները», – նշեց Զարուհի Փոստանջյանը: Նոր համազեկուցողի մասին Զարուհի Փոստանջյանը դժվարացավ կարծիք հայտնել՝ նշելով, որ դա կանի նրա աշխատանքը տեսնելուց հետո նոր միայն:
Իսկ ահա ԲՀԿ խմբակցության պատգամավոր Նաիրա Զոհրաբյանը նշեց, թե ինքը դեմքով չի ճանաչում նոր համազեկուցողին: Ըստ Զոհրաբյանի՝ համազեկուցողները դիտորդական առաքելության այցով Հայաստան են ժամանելու փետրվարի վերջերին կամ մարտի սկզբներին: «Ես նոր համազեկուցողին չեմ ճանաչում, ոչինչ չեմ կարող նրա մասին ասել: Երբ նա կգա Հայաստան, կլինեն նրա գնահատականները, նոր պարզ կլինի, թե որքանով է նա օբյեկտիվ, այսինքն՝ նրա աշխատանքը տեսնելուց հետո արդեն կկարողանամ կարծիք հայտնել», – նշեց Նաիրա Զոհրաբյանը՝ հավելելով, որ իրենց պետք չի, որ համազեկուցողը կոծկի թերությունները, մեղմ գնահատականներ տա: «Մեզ պետք է հավասարակշռված, օբյեկտիվ գնահատականներ մեր երկրում տիրող այն խնդիրների վերաբերյալ, որոնք գտնվում են ԵԽԽՎ մտահոգության տիրույթում»:
Իսկ Չավուշօղլուն անդրդվելի է
Թեև ԵԽԽՎ այս նստաշրջանում Հայաստանի վերաբերյալ կոնկրետ հարց չկար, սակայն օրակարգում շարունակում է մնալ ԼՂ հարցով ենթահանձնաժողովի ստեղծման գաղափարը: Ավելին, ԵԽԽՎ հերթական նստաշրջանի մեկնարկից առաջ ԵԽԽՎ նախագահ Մևլութ Չավուշօղլուն վերահաստատել էր ԼՂ հարցով ենթահանձնաժողովի գործունեությունը վերականգնելու մասին որոշումը և հայտարարել, թե դրա վերաբերյալ նախագիծն ուրբաթ օրը ներկայացվելու է Բյուրոյի՝ հունվարի 28-ին կայանալիք լիագումար նիստի ժամանակ, և հույս հայտնել, որ Բյուրոն այդ օրն էլ կկայացնի վերջնական որոշումը:
Նաիրա Զոհրաբյանը մեզ հետ զրույցում հայտարարեց, թե այդ ենթահանձնաժողովի վերստեղծման վերաբերյալ պատվիրակությանը որևէ բան չեն տեղեկացրել: «Այս պահի դրությամբ որևէ քննարկում չկա», – նշեց նա: Այնուամենայնիվ, ըստ տիկին Զոհրաբյանի, եթե այդ հանձնաժողովը վերստեղծվի, ապա հայկական պատվիրակությունը պետք է բոյկոտի այն: Նրա կարծիքով, այս հարցում հայկական պատվիրակության անդամների տեսակետը մեկն է. ենթահանձնաժողովի վերստեղծումն անթույլատրելի է և կխանգարի ԼՂ խնդրի լուծմանը:
Իսկ Զարուհի Փոստանջյանն այս կապակցությամբ հիշեցրեց, որ Թուրքիան հիմա գլխավորում է ԵԽ նախարարների կոմիտեն, մյուս կողմից` ԵԽԽՎ նախագահն ազգությամբ թուրք է: «Եվ նրանք ամեն ինչ պետք է անեն իրենց կայսերական շահերից ելնելով և արդեն անում են ամեն ինչ: Այնպես որ, մենք այս դեպքում մեր պետության շահերից ելնելով պետք է առաջ տանենք մեր քաղաքականությունը: Թե այստեղ ինչ տեղի կունենա, ես չեմ կարող ասել… սպասենք ուրբաթ օրվան», – նշեց նա:
Արման Գալոյան, «Ժամանակ» օրաթերթ