Թուրքական Haberler.Com կայքի փոխանցմամբ՝ Թուրքիայի վարչապետ Ռեջեփ Էրդողանը Գազիանթեփի օդանավակայանում լրագրողների հետ ունեցած զրույցում մեկնաբանել է երեկ Ֆրանսիայում տեղի ունեցած նախագահական ընտրությունների երկրորդ փուլը, որի արդյունքներով սոցիալիստ թեկնածու Ֆրանսուա Օլանդը ստացել է քվեների 52 տոկոսը, իսկ նախագահ Նիկոլա Սարկոզին՝ 48 տոկոսը.
«Ֆրանսիայի նախագահական ընտրությունների արդյունքները սպասելի էին: Հասարակական կարծիքի հետ ընտրությունների համընկնումը մեծ հաջողություն է: Այս պահից սկսած՝ պարոն Սարկոզին, ինչպես և խոստացել էր, հրաժեշտ է տալիս քաղաքականությանը:
Ամեն դեպքում նա մեկնելու է արձակուրդ, նա այլ անելիքներ չունի: Մենք ցանկանում ենք, որ Ֆրանսիայում սկսված նոր փուլը հանդիսանա Թուրքիայի և Ֆրանսիայի միջև խաղաղության ու համերաշխության փուլ: Եթե նախընտրական շրջանում իշխանությունների արած պոպուլիստական հայտարարությունները կիրառվեն, ապա դա բացասաբար կանդրադառնա թուրք-ֆրանսիական հարաբերությունների վրա: Մենք ցանկանում ենք, որ այդ խոսքերը մնան միայն ԶԼՄ-ների տիրույթում»:
Հիշեցնենք, որ նախընտրական շրջանում Օլանդը խոստացել էր Ֆրանսիայում հիմնել Հայոց ցեղասպանության թանգարան, ինչպես նաև Հայոց ցեղասպանության ճանաչման հարցը դարձնել նախապայման՝ ընկած ԵՄ-ին Թուրքիայի անդամակցության ճանապարհին: