«Յուվենթուս»-ի դարպասապահ Ջանլուիջի Բուֆոնը իտալացի լրագրողներին ներկայացրել է «Լեչե»-ի հետ հանդիպումից հետո ունեցած իր զգացողությունները: Նա նաև ասել է, թե ում է նվիրում Իտալիայի ազգային առաջնությունում նվաճած հաղթանակը:
«Չեմ թաքցնի` «Լեչե»-ի հետ հանդիպման ժամանակ կատարած իմ սխալից հետո ինձ շատ վատ էի զգում: Չէ՞ որ դա էր պատճառը, որ մեզ չհաջողվեց հաղթել: Ես շատ էի վախենում, որ թիմը կարող է տուժել հոգեբանական առումով, և որ ֆուտբոլիստները լարված կլինեն այսօրվա հանդիպմանը: Ուրախ եմ, որ ամեն ինչ բարեհաջող ընթացավ: Ուրախ եմ նաև, որ բոլոր մեր ջանքերը հաղթանակով ավարտվեցին:
Նվիրում եմ «սկուդետտո»-ն Ալեքս Դել Պիերոյին, ում հետ այժմ կարող ենք կիսել ուրախությունը: Ցանկանում եմ նվիրել այս հաղթանակը Կամորանեզիին, Տրեզեգեին, Նեդվեդին` հանճարեղ ֆուտբոլիստներին, ովքեր չլքեցին թիմը նաև Բ Սերիայում:
Ես ինքս չհեռացա ակումբից, երբ այն տեղափոխեցին Բ Սերիա: Այն ժամանակ ամենաբարձր տրանսֆերային արժեք ունեցող ֆուտբոլիստներից էի, սակայն ակումբի հանդեպ տածած զգացմունքներս, հարգանքը խաղընկերներիս նկատմամբ կանխորոշեցին իմ ընտրությունը: Երբևիցե չեմ ափսոսել:
Ամռանը, երբ շփվում էի «Միլան»-ի որոշ ֆուտբոլիստների հետ, ասացի, որ ընթացիկ մրցաշրջանում չեմպիոն ենք դառնալու: Նրանք ծիծաղեցին: Այն ժամանակ շատ էի վիրավորվել»,- իտալական լրատվամիջոցների փոխանցմամբ՝ ասել է Բուֆոնը:
