Չինացի կույր այլախոհ Չեն Գուանչենը կարող է ընդհանուր ընթացակարգով դիմում ներկայացնել արտասահմանում սովորելու հնարավորություն ստանալու համար: Այս մասին, ինչպես հաղորդում է Xinhua գործակալությունը, հայտնել են Չինաստանի ԱԳՆ-ից:
Ավելի վաղ իրավապաշտպանը բազմիցս հայտարարել էր ԱՄՆ տեղափոխվելու իր մտադրության մասին: Մասնավորապես, նա մայիսի 3-ին նման խնդրանքով դիմել էր ԱՄՆ Կոնգրեսի և գործադիր իշխանության Չինաստանի հարցերով հանձնաժողովին:
Հիշեցնենք, ավելի վաղ չինացի կույր իրավապաշտպանը փախել էր տնային կալանքից և թաքնվել ԱՄՆ դեսպանատանը, ապա լքել էր նաև դեսպանատունը:
Չեն Գուանչենը հայտնի է դարձել ստիպողական աբորտի դեմ մղած իր պայքարի շնորհիվ: 2006 թ. նա դատապարտվել էր ավելի քան 4 տարվա ազատազրկման՝ գույքի ոչնչացման և երթևեկությունը փակելու նպատակով ամբոխ հավաքելու մեղադրանքով: Ազատ արձակվելուց հետո նա գտնվում էր տնային կալանքի տակ:
