Հոգեբանական գիտությունների թեկնածու, դոցենտ Կարինե Նալչաջյանը այսօր լրագրողների հետ հանդիպմանը հայտնեց, որ նախընտրական քարոզարշավն անցավ ցածր տոների մեջ՝ առանց ավելորդ կրքերի ու վիրավորանքների:
«Եվ սա շատ լավ էր, առավել քաղաքակիրթ: Ցավալին միայն այն է, որ ընտրարշավի ժամանակ չեղան բովանդակային դեբատներ: Մենք ամենաշատն ականատես եղանք հարցազրույցների, ընտրողների հետ քաղաքական ուժերի դեմ առ դեմ հանդիպումների, սակայն մտքերի բախման այդպես էլ չհանդիպեցինք»,- ասաց հոգեբանը:
Կարինե Նալչաջյանի խոսքով՝ ընտրակաշառքների բաժանման փաստը տրագիկոմեդիայի ժանրից էր: «Միաժամանակ, կաշառքը դադարում է գործոն դառնալ: Մի տեսակ պարադոքսալ ձևով ընտրակաշառքի գաղափարը դուրս է մնում մարդկանց տրամաբանությունից, և նրանք ավելի ազատ, խղճի մտոք են գործում: Այս ընտրություններում կարևորագույնը դառնալու են մարդկանց արժեքային առաջնայնությունները»,- ասաց նա:
Լրագրողներից մեկի հարցին՝ ինչպե՞ս կբնորոշի հանրության նախընտրական տրամադրությունները, հոգեբանը նկատեց, որ ընտրողների հոգեվիճակը թեև ապատիայի չի հասել, սակայն, մեծ հաշվով, չկա քաղաքական մի ուժ, որի ետևից գնա ժողովրդի մեծամասնությունը:
«Մարդկանց տրամադրությունները բավական զուսպ են: Կարծում եմ՝ միջինից բարձր մասնակցություն կունենանք, միաժամանակ մարդկանց մեծ մասն այս ընտրությունների գնում է կուսակցականացված: Այս ընտրություններին ավելի մեծ թվով քաղաքացիներ իրենց գրպաններում կուսակցությունների տոմսեր ունեն»,- ասաց հոգեբանը:
Կարինե Նալչաջյանի խոսքով՝ հայ ընտրողի տառապանքը փորձ ունի, և նա գիտի, որ ընտրությունների հաջորդ օրը, գլոբալ առումով, երկրում ոչինչ չի փոխվելու:
«Ինչ վերաբերում է քաղաքական ուժերի հնարավորություններին, ապա անզեն աչքով անգամ կարելի է տեսնել, որ ՀԱԿ-ի աստեղային ժամն անցել է, նա լուրջ կորուստներ ունի, և ինքն էլ գիտակցում է դա:
«Ժառանգություն»-ը, կարծում եմ, «Ազատ դեմոկրատներ»-ի հետ միասնական ցուցակով հանդես գալուց հետո որոշ ընտրազանգված կորցրեց, իսկ ահա ԲՀԿ-ն վերջին շրջանում արհեստական կերպով շատ սահմանափակվեց»,- նշեց հոգեբանը:
