Պուրակում այնպիսի լուծում չի լինի, որ կրպակատերերը դրոշներով ելնեն: Այսօր լրագրողների հետ հանդիպման ժամանակ նման տեսակետ հայտնեց ԱԺ ՀՀԿ խմբակցության ղեկավար Գալուստ Սահակյանը` անդրադառնալով ՀՀ նախագահ Սերժ Սարգսյանի` Մաշտոցի պուրակի վերաբերյալ երեկվա հանձնարարականին:
Նա նշեց՝ չի կարծում, թե որևէ մեկի վարկանիշի վրա ազդեց նախագահի քայլը: Բանախոսի որակմամբ` դա համապետական խնդիր չէր, որ նախագահը ամեն օր նստեր և լուծեր:
«Նա ընդամենը ասաց, որ օրենքի շրջանակներում կլինեն լուծումներ, որ կրպակատերերի հետ պետք է բանակցել, և գործընթացներ պետք է լինեն: Սանձարձակության հարց էր արդեն առաջացել, ոստիկանության վրա հարձակումներ էին տեղի ունենում: Լուծումը այնպես չի լինի, որ այս անգամ կրպակատերերը դրոշներով գան»,- մեկնաբանեց Գալուստ Սահակյանը:
Հարցին՝ ինչքանո՞վ է հասարակությունը վստահում ՀՀԿ-ին, պատասխանեց, որ դա ցույց կտան ընտրությունների արդյունքները: Նրա խոսքով` քարոզարշավը PR է, բայց դրանով երկիր ղեկավարել հնարավոր չէ:
«Մենք մեր դերակատարումը շատ լավ ենք զգում, մենք մարտական մատույցներում ենք եղել, հասարակությունը լավ է պատկերացնում՝ եթե լինի պատերազմ, հաղթանակը Հանրապետականինն է լինելու: Այսօր ՀՅԴ-ն և ՀՀԿ-ն են խոսում հայ-ադրբեջանական հարցից»,- ասաց Գալուստ Սահակյանը` հավելելով, որ որևէ կուսակցություն այդ մասին չի մտածում, իսկ Հանարապետականը երկրի անվտանգությունն ապահովողն է: Բայց նա նաև ավելացրեց՝ չի ասում, թե ՀՀԿ-ն ամենալավն է, պարզապես այս պահին իրենցից լավը չկա:
