Ես ՀԱԿ-ի հետ եմ, իսկ ՀԱԿ-ը` ոչ: Այսօր «Առաջին լրատվական»-ի հետ զրույցում նման տեսակետ հայտնեց թիվ 12-րդ ընտրատարածքում առաջադրված պատգամավորության թեկնածու, անկուսակցական Գոհար Վեզիրյանը: Նա նշեց, որ նպատակահարմար է գտնում որպես անկուսակցական պայքարել գործող ռեժիմի դեմ, բայց դա չի նշանակում, որ նա չի կարող պայքարել այս կամ այն քաղաքական ուժի հետ:
«Ասել եմ, որ ՀԱԿ-ի հետ միասին պայքարել եմ, այսինքն` ՀԱԿ-ը քյալլա է խփել, ես էլ` ՀԱԿ-ի հետ միասին: Հիմա ինչ քաղաքական ուժ գա քյալլա տալու լավ Հայաստանի համար, ես այդ քաղաքական ուժի հետ նորից քյալլա եմ տալու լավ Հայաստանի համար: Վաղը ևս ՀԱԿ-ը կարող է շարունակի պայքարել, ես ՀԱԿ-ի հետ կպայքարեմ, եթե ՀԱԿ-ը չլինի, լինի ուրիշ քաղաքական ուժ, որը նույն սկզբունքայնությամբ կպայքարի գործող ռեժիմի դեմ հանուն պետության, հանուն ժողովրդավարական արժեքների, ես այդ ուժի հետ կպայքարեմ, որպես քաղաքացի»,- մեկնաբանեց Գոհար Վեզիրյանը` հավելելով, որ այդ դեպքում կգնա նրանց հանրահավաքներին, ակտիվ կլինի դրանց ժամանակ, եթե այդ քաղաքական ուժի շրջանակներում քաղաքացիական նախաձեռնություն լինի՝ ևս մասնակից կդառնա:
Սակայն նա վերահաստատեց, որ այսօր էլ ՀԱԿ-ը պայքարում է և ինքը ՀԱԿ-ի հետ է շարունակում պայքարել, սակայն ՀԱԿ-ն իր հետ չէ, քանի որ նույն ընտրատարածքում թեկնածու է առաջադրել: Պատգամավորի թեկնածու Գոհար Վեզիրյանը նկատի ունի ՀԱԿ թեկնածու Տիգրան Տեր-Պետրոսյանին:
Նշենք, որ թիվ 12-րդ ընտրատարածքում իրենց թեկնածությունն են առաջադրել նաև ԱԺ «Ժառանգություն» խմբակցության պատգամավոր Անահիտ Բախշյանը, ԲՀԿ ներկայացուցիչ Լյովա Խաչատրյանը, ՀԱԿ թեկնածու Տիգրան Տեր-Պետրոսյանը, ՕԵԿ կողմից առաջադրված Ռոբերտ Մասումյանը և ՀՅԴ անդամ Կառլեն Գևորգյանը: