Այսօր Բաքվում կայացել է Կովկասում ԵՄ հատուկ ներկայացուցիչ Փիթեր Սեմնեբիի հանդիպումը Ադրբեջանի նախագահ Իլհամ Ալիևի հետ: Նախագահի լրատվական ծառայության տարածած հաղորդագրության համաձայն` հանդիպմանը ղարաբաղյան հակամարտության կարգավորման շուրջ մտքեր են փոխանակվել, ինչպես նաև քննարկվել է Ադրբեջանի և Եվրամիության միջև համագործակցությունը: Անձամբ Սեմնեբին ասել է, որ, նշված հարցերից բացի, քննարկվել է նաև Ադրբեջանի ներքաղաքական իրավիճակն ու Ադրբեջանի հարաբերությունները հարևան երկրների հետ,- հաղորդում է Trend-ը: ԵՄ հատուկ ներկայացուցիչը նաև ասել է, որ Ադրբեջանի և ԵՄ հարաբերությունների կարևորագույն առաջնահերթություններից է մարդու իրավունքների պաշտպանությունն ու լրատվամիջոցների ազատությունը: Դրանք նաև Ադրբեջանի և ԵՄ միջև ասոցիացիայի մասին պայմանագրի շուրջ բանակցությունների էական մասն են կազմում: