Ռուսաստանը Սիրիայի հակամարտող ուժերին կոչ է անում դադարեցնել բռնությունները և ամբողջ ծավալով կատարել շաբաթ օրը ՄԱԿ ԱԽ-ի ընդունած բանաձևի պահանջները: Այս մասին ասվում է ՌԴ ԱԳՆ հաղորդագրության մեջ:
«Կրկին կոչով դիմում ենք ընդդիմության վրա ազդեցություն ունեցող պետություններին` դրդելու համանման գործողությունների: Ռուսաստանն ակտիվորեն կաջակցի այդ նպատակի իրականացմանը՝ Սիրիայի կառավարության և ընդդիմության ներկայացուցիչների հետ ունեցած շփումների շրջանակներում»,- ասվում է ՌԴ ԱԳՆ հայտարարության մեջ:
Հիշեցնենք, որ Ռուսաստանը ՄԱԿ ԱԽ–ում ներկայացրել էր իր սեփական բանաձևը` Սիրիայում ՄԱԿ-ի մոնիթորինգային առաքելություն իրականացնելու վերաբերյալ, որն ուղղված կլինի հատուկ բանագնաց Քոֆի Անանի ջանքերի սատարմանը: Այսօր ՄԱԿ ԱԽ-ն ընդունել է Ռուսաստանի պատրաստած բանաձևը, ըստ որի՝ «անհետաձգելի կերպով» 90 օր ժամկետով Սիրիա են ուղարկվելու մինչև 300 ռազմական դիտորդներ:
