Ուկրաինայի նախկին վարչապետ Յուլյա Տիմոշենկոյի մերձավորները շաբաթ օրը հրապարակել են գերմանացի բժիշկների եզրակացությունը, որտեղ նշվում է, որ իրենք, ուսումնասիրելով Խարկովի այն բժշկական հաստատությունը, որտեղ բանտից տեղափոխել են Տիմոշենկոյին, եկել են այն եզրահանգման, որ նրան նման պայմաններում անհնար է բուժել:
Տիմոշենկոն տեղափոխվել է Խարկովի գաղութից նույն քաղաքի հիվանդանոց: Նախկին վարչապետի կողմնակիցները կասկածում են, որ նրան հիվանդանոց են տարել իր կամքին հակառակ:
Հիշեցնենք, որ փետրվարի կեսերին, առողջական խնդիրների հետ կապված, Տիմոշենկոյին հետազոտել էին գերմանացի մի խումբ բժիշկներ: Նրանք խորհուրդ էին տվել քաղաքական գործչին բուժել գաղութի պատերից դուրս: Բանտարկյալին որոշել էին տեղափոխել Խարկովի հիվանդանոց, սակայն վերջինս պնդել էր, որ կհամաձայնի բուժվել, եթե գերմանացի մասնագետները հետազոտեն հիվանդանոցը և հավանություն տան:
Անցած շաբաթ գերմանացի բուժաշխատողները հետազոտել էին հիվանդանոցը և եկել այն եզրահանգման, որ այն կարող է անհրաժեշտ օգնությունը ցույց տալ նախկին վարչապետին: Միևնույն ժամանակ Տիմոշենկոյի պաշտպանությունը հայտարարում է, որ բժիշկները խորհուրդ չեն տվել Տիմոշենկոյին Խարկովում բուժվել:
Հրապարակված նյութում նշվում է, որ Տիմոշենկոյի համար ընտրված հիվանդանոցը համապատասխանում է բոլոր եվրոպական չափանիշներին, սակայն նրա բուժման համար օգտակար չի կարող լինել:
