Համաշխարհային շուկայում արդեն երրորդ շաբաթն է, ինչ, ԱՄՆ տնտեսության վերականգնման ֆոնին, նվազում է ոսկու գինը, քանի որ նվազում է իրենց ակտիվները թանկարժեք մետաղներով պահելու՝ ներդրողների շահագրգռվածությունը: Նյու Յորքի Comex բորսայում փետրվարյան ֆյուչերսների գինը նախորդ շաբաթ էժանացել է 0.4%-ով` կազմելով 1,341 դոլար 1 ունցիայի դիմաց: Նախանցած շաբաթ ոսկու գինը նվազել էր 1.4%-ով, իսկ դրան նախորդող շաբաթում` 4.3%-ով: Հիշեցնենք, որ ԱՄՆ ֆեդերալ ռեզերվային համակարգը (Կենտրոնական բանկը) 2008 թ. դեկտեմբերից վերաֆինանսավորման տոկոսադրույքը պահում է ռեկորդային ցածր մակարդակի` 0-0.25%-ի շրջանակներում: Ճգնաժամի ժամանակ ոսկին յուրահատուկ հետաքրքրություն առաջացրեց ներդրողների շրջանում` որպես առավել ապահով այլընտրանք անկայուն փոխարժեքի կուրսի և ընկերությունների ակտիվների համեմատ: 2010 թ. ոսկին միջինում թանկացավ 30%-ով` արձանագրելով գնի աճ արդեն 10-րդ տարին անընդմեջ:
