Fox հեռուստաընկերությունը հրաժարվել է Super Bowl-ի (ԱՄՆ ազգային լիգայի եզրափակչի) հեռարձակման ժամանակ ցուցադրել JesusHatesObama.com («Հիսուսն ատում է Օբամային») հումորային կայքի գովազդը: Այս մասին գրում է The Huffington Post ամերիկյան կայքը:
Գովազդում պատկերված են Օբամայի և Հիսուսի շարժվող գլուխներով երկու փոքրիկ տիկնիկներ: Գովազդային հոլովակում Օբամայի պատկերով տիկնիկը ընկնում է ակվարիումի մեջ, ինչից հետո Հիսուսի դեմքին ժպիտ է հայտնվում:
Հեռուստաընկերության որոշման մասին պատմել է JesusHatesObama.com կայքի և օնլայն խանութի սեփականատեր Ռիչարդ Բելֆրին: Նրա խոսքերով, իրենք Fox-ին գովազդը ցուցադրելու առաջարկ են արել երկու անգամ` անցած տարվա դեկտեմբերին և այս տարվա հունվարին, սակայն երկու անգամ էլ մերժում են ստացել:
CNN հեռուստաընկերության կայքի հաղորդմամբ, Բելֆրին իրեն համարում է «պահպանողական երգիծաբան»: Նրա ինտերնետ-խանութում վաճառվում են ապրանքներ Օբամային ծաղրող տարաբնույթ գրություններով: Այնտեղից կարելի է ձեռք բերել «Հիսուսը ատում է Օբամային» կամ «Հիսուսը սիրում է քեզ, բայց ատում է Օբամային» գրվածքով շապիկներ և բաժակներ: Բելֆրին նշել է, որ իր կայքի գործունեության օրվանից` 2009թ. մինչ այսօր նա վաճառել է ավելի քան 70 հազար նման շապիկներ: Միևնույն ժամանակ նա ընդգծել է, որ չի մտածում, թե Աստվածն ատում է Օբամային, պարզապես ինքը «հավատում է ազատությանը»: Բելֆրիի կարծիքով, նման կերպ ինքը ծաղրում է ԱՄՆ նախագահի վարչակազմը:
Նշենք, որ Super Bowl-ի հեռարձակումը ամերիկյան գովազդատուների համար կարևորագույն իրադարձություններից մեկն է համարվում: Այդ ժամանակ հեռուստաընկերությունները մեծ թվով հանդիսատես են հավաքում: Օրինակ` 2010-ին Սուպերգավաթի խաղերը դիտել է 7,8 միլիոն մարդ:
