ԱԺ ընտրությունները սոցիալ-տնտեսական ծրագրերի հիման վրա պետք է անցկացվեն, մինչդեռ ոչ մի քաղաքական ուժ նորմալ ծրագրեր չի ներկայացրել՝ բացի ՀԱԿ-ից. այսօր լրագրողների հետ հանդիպմանը հայտարարեց ՀՀ նախկին վարչապետ, ՀԱԿ տնտեսական հանձնաժողովի ղեկավար Հրանտ Բագրատյանը: Նա հայտարարեց, որ ՀԱԿ-ը 5 տարում իր ծրագիրը 100%-ով կկատարի և կհանի երկիրը այս վիճակից:
«Այն ժամանակ Սերժ Սարգսյանն ինձ մոտ նախարար էր, ու բազմիցս է ասել, որ ոչ մեկը երկիրը այդ վիճակից չէր հանի»,- հիշեց ՀՀ նախկին վարչապետը:
Ըստ բանախոսի՝ ՀՀ-ում 7.5% տնտեսական աճից հետո միայն կդադարի արտագաղթը: Հանքարդյունաբերության աճի հաշվին տնտեսությունը հնարավոր չէ զարգացնել, քանի որ աշխարհն ավելի արագ է զարգանում:
ՀԱԿ-ը խոստանում է ոչ մի նոր պարտք չվերցնել, ստերիլիզացնել տրանսֆերտները, ստեղծել կայունացնող հիմնադրամ, տնտեսության 11-12%-անոց աճ ապահովել, իսկ բյուջեի աճը, ըստ Բագրատյանի, կլինի կրկնակի, քան տնտեսության աճը, քանի որ օլիգարխները կմուծեն հարկերը: Երկրում գյուղացիների հետ միասին կլինի 500 հազար աշխատատեղ:
Հ. Բագրատյանի խոսքով՝ ՀԱԿ-ն աշխատատեղեր չի ստեղծելու, այլ ապահովելու է միջավայր, որ մարդիկ իրենք իրենց համար աշխատատեղ ստեղծեն. «Կայուն է այն աշխատատեղը, որ ժողովուրդն ինքն է ստեղծում»:
ՀԱԿ-ն օլիգարխիայի դեմ պայքարելու է առաջին հերթին մաքսային ծառայությունը փոխելով. կլինի հարկերի կտրուկ բարձրացում` 12 անգամ կբարձրանան Քաջարանի ու մետաղական հանքերի հարկերը:
Հ. Բագրատյանը նշեց, որ պատրաստ է բանավիճել, նույնիսկ Ռուբեն Հայրապետյանի հետ, եթե ՀՀԿ-ն որոշի, որ Ռուբեն Հայրապետյանն է ներկայացնում իրենց տնտեսական բլոկը: Միաժամանակ նա նկատեց, որ ներկայում ՀՀԿ-ին ձեռնտու է պարտվել, այլապես կկործանեն թե՛ երկիրը, թե՛ իրենց:
Խորհրդարան անցնելուց հետո ՀԱԿ-ը, ըստ Հ. Բագրատյանի` կախված ուժերի դասավորությունից, պատրաստ է համագործակցել, եթե գործադիր իշխանությունը ղեկավարի ՀԱԿ-ը:
«Առաջին լրատվական»-ի հարցին` ի՞նչ խորհուրդ կտաք քաղաքացիներին` ինչո՞վ առաջնորդվել ընտրություն կատարելիս, եթե քաղաքական ուժերը ծրագիր չեն ներկայացնում, Հ. Բագրատյանը պատասխանեց. «Մենք ներկայացնում ենք»:
Մեր այն հարցին, թե ի՞նչ պետք է արվի կիրառվելիք ընտրակեղծիքների դեմ, ՀՀ նախկին վարչապետը հայտարարեց. «Պետք է ոտքի կանգնենք»:
Նա նաև հայտնեց, որ ուրբաթ երեկոյան Երևանում կկայանա ՀԱԿ հանրահավաքը, վաղը գնում են Արմավիր, ընտրողների հետ հաջորդ հանդիպումը կլինի Սյունիքում:
