«Ատլանտյան խորհրդի» Եվրասիա կենտրոնի մասնագետ Ալեքսանդրոս Պետերսոնը թուրքական Hurriyet թերթում տպագրված` «Ո՞վ կխաղա գլխավոր դերը եվրասիական խողովակային օպերայում» հոդվածում կասկած է հայտնել, որ Nabucco-նհաջողությամբ գործարկվելու է:
Դրա պատճառը կարող է լինել Թուրքմենստանի դիրքորոշումը: Աշգաբադը ներկայումս շատ է հետաքրքրված Հարավային Միջանցք նախագծով, որի մաս է կազմում Nabucco-ն, սակայն փորձագետը գտնում է, որ Եվրասիայում արագ փոփոխվող էներգետիկ քաղաքականությունը կարող է վերացնել այս հետաքրքրությունը: Պետերսոնի կարծիքով, այս հանգամանքին պետք է լուրջ ուշադրություն ցուցաբերեն Եվրոպայում վառելիքային շուկաների դիվերսիֆիկացման ջատագովները: Թուրքմենստանը ներկայումս, Ռուսաստանից բացի, մի քանի շուկաներ դուրս գալու հնարավորություն ունի` Չինաստան, Պակիստան, սակայն կայունության տեսակետից նախընտրում է Եվրոպա գազի առաքման նախագծերը:
Այստեղ, սակայն, ևս խնդիրներ կան, մասնավորապես` Կասպից ծովի հատակով խողովակաշարի կառուցումը և Ադրբեջանի հետ Սերդար/Քյափազ գազային հանքավայրի շուրջ վեճը: Մյուս կողմից` Աշգաբադի առաջ բացվում է Եվրոպայի հսկայական էներգետիկ կայուն շուկան: Պետերսոնի կարծիքով, Եվրոպան պետք է ավելի մեծ ուշադրություն դարձնի տրանս-ադրիատիկ խողովակաշարին, քանի որ այն տնտեսապես ամենաշահավետը կարող է լինել և անհրաժեշտության դեպքում հնարավորություն ունի ծավալվել դեպի Կենտրոնական Ասիա: Այս կարծիքը վերջերս անուղղակիորեն հաստատել էր նաև եվրասիական էներգետիկ հարցերով ԱՄՆ հատուկ ներկայացուցիչ Ռիչարդ Մորնինգսթարը:
Հոդվածի վերջում Պետերսոնը շեշտում է, որ «Հարավային միջանցք» նախագիծը ոչ միայն Եվրոպայի համար անհրաժեշտ վառելիքի մատակարարման կենսական աղբյուր է, այլ նաև` տարածաշրջանում Ռուսաստանի և Չինաստանի ազդեցության դեմ լուրջ քաղաքական ակտիվ:
