2008թ. Շվեյցարիայի թանգարանից գողացված Պոլ Սեզանի` ավելի քան 10 մլն արժողությամբ «Կարմիր բաճկոնակով տղան» կտավը հայտնաբերվել է Սերբիայում: Այս մասին հայտնում է ITAR-TASS գործակալությունը` հղում կատարելով տեղի ոստիկանությանը:
Բելգրադում ու Չաչակեում կալանավորվել են երկու կասկածյալներ, որոնք Սերբիայի քաղաքացիներ են:
Ոստիկանների խոսքով՝ «հետաքննությունն ընթացել է Շվեյցարիայի իրավապահ մարմինների աշխատակիցների հետ սերտ համագործակցության պայմաններում, իսկ նրանց կալանավորելու գործողությունը ձգվել է մի քանի ամիս»:
«Կարմիր բաճկոնակով տղան» կտավը Ցյուրիխի թանգարանից գողացվել էր Էդգար Դեգայի, Վինսենտ վան Գոգի ու Կլոդ Մոնեի մի քանի այլ աշխատանքների հետ: Պահպանվել էին հափշտակության տեսաերիզները, որտեղ երևում էր, որ դրան մասնացկել է 3 դիմակավորված անձ:
Գողացված նկարների ընդհանուր գումարը կազմել է 112 մլն եվրո, ինչն այս գողությունը դարձրեց Շվեյցարիայի պատմության մեջ խոշորագույնը:
Որոշ ժամանակ անց գողացված նկարները ոստիկանությունը հայտնաբերեց հանցագործների լքած ավտոմեքենայի բեռնախցիկում, մի մասը`ավելի ուշ:
Ոստիկանները հուսով են` չարագործներին կալանավորելը կօգնի պարզել նաև արվեստի մյուս գործերի տեղը, որոնց թվում է նաև Դեգայի «Լյուդովիկ Լեպիկն ու նրա դուստրերը»` 5մլն դոլար արժողությամբ:
