«Ազատ դեմոկրատներ»-ը և «Ժառանգություն»-ը Չարենցավանի կինոթատրոնի մոտ հանդիպեցին ընտրողների հետ: Ելույթ ունեցավ ԱԺ նախկին փոխխոսնակ, նախկին քաղբանտարկյալ Կարապետ Ռուբինյանը, որը հավաքվածներին կոչ արեց՝ անկախ նրանից, թե որ ուժի կողմնակից են, ընտրության գնալ այն գիտակցությամբ, որ սխալ ընտրությամբ ենք տանում մեր երեխաների ապագան, մենք կործանման ենք տանում մեր երկիրը:
Ռուբինյանն ընդգծեց, որ այս տարիների ընթացքում 3, 5 միլիոնից դարձել ենք 2.5 միլիոն: Աղքատությունը 60 տոկոսի է հասել, և այսքանից հետո իշխանությունը կոչ է անում իրեն հավատալ և փոխել ինչ-որ բան:
Ռուբինյանի ելույթի ժամանակ Զարուհի Փոստանջյանին մոտեցավ Չարենցավանի քաղաքապետ Հակոբ Շահգալդյանը և խնդրեց պարզաբանել, թե ինչու իրենք նախապես քաղաքապետարանին չեն տեղեկացրել, որ կինոթատրոնի բակում նախատեսում են հանդիպում ընտրողների հետ:
Փոստանջյանը, ինչպես նաև «Ազատ դեմոկրատներ»-ի անդամ, նախկին արտգործնախարար Ալեքսանդր Արզումանյանը քաղաքապետին խորհուրդ տվեցին չխանգարել ելույթների ընթացքը, իսկ Փոստանջյանն էլ իր ելույթով պատասխանեց քաղաքապետի հարցադրմանը` նշելով, թե «իրենք ՀՀ տարբեր քաղաքներում և գյուղերում որևէ ներկայացուցչի իրազեկելու կարիք չունեն: Երկիրը պատկանում է ժողովրդին, և ժողովուրդը ցանկացած տեղ հավաքվելու և մտքեր փոխանակելու իրավունք ունի, և իշխանության ներկայացուցիչը չէ, որ պետք է ասի՝ որտեղ և երբ պետք է իրենք հավաքվեն»:
