Չինաստանի Շանցին գյուղում, որը մոտ է երկրի մայրաքաղաք Պեկինին, արձանագրվել է թռչունների մասսայական անկում: Սյաոցին գետի մոտ հայտնաբերվել են տասնյակ սատկած սև կեռնեխներ և վայրի բադեր:
Ինչպես գրում է ռուսական Vzglyad.ru կայքը, տեղի բնակիչները մտահոգություն են հայտնել, որ սատկած թռչունները կարող էին իրենց հետ վտանգավոր հիվանդություն բերած լինել: Սակայն, ինչպես նշել են մասնագետները, թռչունների մոտ թռչնագրիպ չի հայտնաբերվել: Չի հայտնաբերվել նաև ինֆեկցիոն այլ հիվանդություն: Նույն մասնագետները նշել են, որ թռչունները կարող է սատկած լինեն սովից կամ եղանակային վատ պայմաններից: Վերջին մեկ ամսվա ընթացքում թռչունների անկման դեպքերն աշխարհի տարբեր ծայրերում արդեն սկսել են լուրջ մտահոգություն առաջացնել, քանի որ մասնագետները չեն կարողանում դրան հստակ պատասխան տալ: