Թուրքական Vatan թերթի փոխանցմամբ՝ Թուրքիայի տնտեսական և արտաքին քաղաքականության հետազոտական կենտրոնը (EDAM) սեփական ատոմային ռումբ ունենալու վերաբերյալ մարտի 3-6-ը հարցախույզ է անցկացրել Թուրքիայի 81 նահանգներից 15-ում: Հարցախույզին մասնակցել է 18-ից բարձր տարիք ունեցող 500 մարդ:
Հարցախույզի մասնակիցների 54 տոկոսը կարծում է, որ Իրանի միջուկային ծրագրի զարգացման (Իրանից բխող սպառնալիքի) ֆոնին Թուրքիան պետք է աշխատանքներ տանի սեփական ատոմային զենքի ստեղծման ուղղությամբ: 8.2 տոկոսը կարծում է, որ դա անհրաժեշտ չէ, քանի որ ՆԱՏՕ-ն ապահովում է Թուրքիայի անվտանգությունը: 34.8 տոկոսն էլ կտրականապես դեմ է Թուրքիայի կողմից սեփական ատոմային զենքը ստեղծելուն:
EDAM-ի նախագահ Սինան Ուլգենը հայտարարել է, որ հարցախույզի արդյունքները վկայում են, որ թուրք ժողովուրդը չի հավատում իրանական սպառնալիքի ֆոնին ՆԱՏՕ-ի կողմից Թուրքիայի անվտանգության ապահովմանը:
Հիշեցնենք, որ 2010 թվականին թուրք փորձագետ, TÜRKSAM միջազգային հարաբերությունների և ռազմավարական վերլուծությունների կենտրոնի փոխնախագահ Ջելալեթին Յավուզը նշել էր, թե ինչու են ոչ միջուկային երկրները ձգտում հայտնվել միջուկային երկրների շարքում: Ըստ Յավուզի`երկու պատճառով. ա) թշնամուն վախ ներշնչելու, բ) այլ երկրների կողմից հարգանք վայելելու:
Հենց այդ նկատառումներից ելնելով` Յավուզը կարծում է, որ եթե Իրանը տիրապետի միջուկային զենքի, ապա դա ամենևին էլ չի նշանակի, որ նա անպայմանորեն կուղղի մեկ այլ պետության դեմ: Ավելին` եթե նույնիսկ Իրանը գնա այդ քայլին, ապա Թուրքիան ընդգրկված չի լինի իրանական առաջին միջուկային հարվածին ենթարկվող երկրների գոտում հետևյալ 4 պատճառներով.
ա) Իրանի բնակչության գրեթե կեսն ունի թյուրքական ծագում, ինչը հանդիսանում է Իրանի կողմից Թուրքիային միջուկային հարված հասցնելու կանխիչ գործոն, բ) Թուրքիան ՆԱՏՕ-ի անդամ է և գտնվում է ՆԱՏՕ-ի «միջուկային անձրևանոցի» հովանու ներքո, այսինքն` դեպի Թուրքիա միջուկային հրթիռ արձակելը հակառակ ազդեցությունը կունենա նման կերպ վարվող երկրի համար և աննախադեպ վնասներ կպատճառի նրան, գ) Թուրքիայի տարածքում անգամ միջուկային մեկ ռումբի պայթյունն էական ազդեցություն կթողնի մթնոլորտի վրա, ինչն անխուսափելիորեն կազդի նաև հարևան Իրանի (և ոչ միայն) վրա, դ) Իրանի այդ քայլը կհանգեցնի մահմեդական աշխարհում նրա մեկուսացմանը, քանի որ դա կառաջացնի տվյալ հարցում մահմեդական հանրության անըմբռնողությունը և զայրույթը:
