Տարբեր տիպի միջոցառումների կազմակերպման, ազգային ավանդույթների, սեփական լեզվի և մշակույթի պահպանման հարցում լեհական համայքն ամենաակտիվն է Հայաստանում: Բացի բոլոր փոքրամասնությունների համար տարվա մեջ 2 անգամ պարտադիր անցկացվող միջոցառումներից` լեհերը կազմակերպում են տարատեսակ փառատոներ, հաճախակի հավաքվում են իրենց կենտրոնում և սովորում իրենց ազգային երգն ու պարը, գիրն ու գրականությունը, սեփական պատմությունը, ծանոթանում են նաև Հայաստանի և Լեհաստանի բոլոր տեսարժան վայրերին: Լեհական համայնքը հրատարակում է նաև «Քանի դեռ ապրում ենք» ամսագիրը, որտեղ անդրադառնում է յուրաքանաչյուր ամիս իրենց մոտ կազմակերպվող միջոցառումներին և ամեն համարում ներկայացնում է լեհական քաղաքները, թագավորներին, գրողներին, երաժիշտներին, դերասաններին և այլն: Լեհական համայնքին այժմ մեծ ուրախություն է պատճառում նաև այն հանգամանքը, որ Երևանի Վ. Բրյուսովի անվան պետական լեզվաբանական համալսարանում արդեն բացվել է լեհերենի ամբիոն, որտեղ իրենք հնարավորություն ունեն ավելի խորն ուսումնասիրել մայրենի լեզուն: Լեհական համայնքի ղեկավար Ալլա Կուզմինսկայան նշում է¸ որ իրենց կենտրոնում նաև Հայաստանի լեհերին սովորեցնում են լեզուն, Լեհաստանի պատմությունը, ավանդույթներն ու ազգային տոները: «Լեհաստանն ուղարկում է անհրաժեշտ բոլոր դասագրքերն ու ուսուցիչներին: Ամեն տարի մոտ 12 երեխա ենք 2 շաբաթով ուղարկում Լեհաստան, որպեսզի մոտիկից ծանոթանան մեր մշակույթին: Ինչ-որ հատուկ խնդիրներ Հայաստանում լեհերը չունեն, ապրում ենք նույն կերպ, ինչ հայերը»¸- ասում է լեհական համայնքի ղեկավարը:
