Ռուսաստանի արտգործնախարար Սերգեյ Լավրովը հերքել է, որ Մոսկվան պատրաստվում է վրեժ լուծել ԱՄՆ-ում 25 տարվա ազատազրկման դատապարտված Վիկտոր Բուտի համար:
«Մենք ցանկանում ենք այս իրավիճակում ոչ թե վրեժ լուծել, այլ օգնել Վիկտոր Բուտին, որը միանգամայն անարդարացիորեն դատապարտվել է 25 տարվա ազատազրկման: Ես դեռ չեմ խոսում այն մասին, որ նա փաստացիորեն անօրինական կերպով է տեղափոխվել Միացյալ Նահանգներ»,- ասել է Լավրովը:
Ավելի վաղ Ռուսաստանի ԱԳՆ-ն քննադատական հայտարարություններ էր հնչեցրել Բուտի դատավճռի վերաբերյալ: Դրանում նշվում էր, որ դատավճիռը «հստակ քաղաքական պատվեր է»: Ռուս դիվանագետները նաև նշել էին, որ ԱՄՆ-ում դեռ նախքան դատավճիռը Բուտին հայտարարել էին «մահվան վաճառական»:
Ռուսաստանի ԱԳՆ-ն նաև խոստացել է հնարավորինս արագ Բուտին վերադարձնել հայրենիք՝ նշեով, որ այդ հարցը կլինի ռուս-ամերիկյան օրակարգի առաջնային խնդիրներից մեկը:
Վիկտոր Բուտը ձերբակալվել է Բանգկոկում՝ 2008 թ. մարտին ամերիկյան հատուկ ծառայությունների կողմից իրականացված գործողության արդյունքում: 2010 թ. նոյեմբերին Թայլանդի իշխանությունները նրան հանձնեցին ԱՄՆ-ին:
ՄԱԿ-ի և ԱՄՆ իշխանությունների տվյալներով՝ Բուտը և իր գործընկերները ներգրավված են Աֆղանստանին, Անգոլային, Կոնգոյի Ժողովրդավարական Հանրապետությանը, Լիբերիային, Ռուանդային, Սուդանին և Սիերա Լեոնեին անօրինական զենք մատակարարելու մեջ:
