Երևանի քաղաքապետ Կարեն Կարապետյանի որոշման համաձայն Երևան քաղաքն այսուհետ կունենա նաև գլխավոր դիզայներ, ով երևի պետք է հետևի քաղաքի արտաքին տեսքին և դիմագիծ հաղորդի մեր մայրաքաղաքին:
«Առաջին լրատվականը» փորձեց իմանալ, թե ինչ պարտականություններ ունի Երևանի գլխավոր դիզայները Երևանի նախկին գլխավոր նկարիչ Սամվել Սևադայից:
«Երևանի գլխավոր նկարչի կամ դիզայների պարտականությունների մեջ էր մտնում քաղաքի արտաքին տեսքը կարգավորելը: Ես առաջին անգամ գովազդի մասին օրենքը պատրաստեցի, և ներկայացրինք Ազգային ժողով, քանի որ մինչ այդ օրենքը` ամեն ինչ վայրենի կերպով էր արվում. ով որտեղ ուզում էր գովազդ էր փակցնում: Երբ ես աշխատանքի անցա, զբաղվեցի քաղաքի լուսավորությամբ և փողոցների մաքրմամբ: Առաջին փողոցը, որ սկսեցինք կարգի բերել այսօրվա Պռոշյան փողոցն է, որն առաջ ամբողջությամբ ծածկված էր մանղալներով, մենք սկսեցինք մաքրել այդ ամենը»:
Նախկին նկարիչն իր պաշտոնավարման ընթացքում քաղաքի ցուցանակների, քաղաքի ցանկապատների էսքիզներ անելով տեսքի է քաղաքի շատ փողոցներ. «Մեր գործն անելու համար քաղաքում այդքան էլ գումար չկար, և մենք անում էինք այնքան, ինչքան հնարավորություն կար: Բացի դրանից` այդ ծանր տարիներից հետո առաջին տոնածառը ձևավորեցինք և դրեցինք,գազանանոցը կարգի բերեցինք: Վատ, ծանր տարիներից հետո սկսեցինք քաղաքը կարգավորել և տեսքի բերելե:
Սամվել Սևադան ճիշտ է համարում, որ քաղաքը պետք է ունենա իր դիզայները,
քանի որ քաղաքի արտաքին տեսքի հետ կապված շատ խնդիրներ կան, որ պետք է լուծվի. «Շատ աշխատանքներ կան քաղաքի արտաքին տեսքի հետ, որ այդ դիզայները կամ նկարիչը պետք է կատարի: Շատ լավ կլինի եթե քաղաքին բնորոշ դիմագիծ ստեղծվի, ոչ թե հախուռն ձևով այդ ամենը արվի: Մենք այն ժամանակ կարծում էինք, որ վարդագույն Երևանը պետք է պահվի, որովհետև յուրահատուկ բան է ամբողջ աշխարհում»:
Գեղանկարիչը առիթ ընձեռվելու դեպքում ցանկություն չհայտնեց ևս մեկ անգամ լինել քաղաքի գլխավոր նկարիչ. «Չէի ցանկանա նորից լինել քաղաքի գլխավոր նկարիչ, որովհետև այսօր ես իմ արվեստանոցում երեխաներին նկարչություն եմ սովորեցնում և ինձ ավելի լավ եմ զգում»:
Հիշեցնենք, որ Սամվել Սևադան Երևանի գլխավոր նկարիչ է եղել 1997-98թթ.:
«Ես մեծ հաճույքով Գյումրիի գլխավոր նկարիչ կաշխատեի հենց հիմա, եթե ինձ այդպիսի հնարավորություն տային: Ես շատ կուզեի, որ Գյումրին կարգավորվեր, հին շենքերը պահպանվեին: Գյումրիում խիստ հետևողական աշխատանքներ պետք է տարվեն քաղաքի արտաքին տեսքի հետ կապված»,- «Առաջին լրատվականի» հետ զրույցում ցանկություն հայտնեց գեղանկարիչ Սամվել Սևադան:
