Անգլիայի Նոթինգհեմշիր կոմսության ոստիկանությունը օպերացիա է իրականացրել` փրկելու սպանիել տեսակի քնած շանը, որը, ինչպես պարզվեց, իրականում փափուկ խաղալիք էր:
The Sun-ի փոխանցմամբ` դեպքը տեղի է ունեցել մարտի 26-ին` Մենսֆլիդ քաղաքում: Այդ օրը քաղաքում օդի ջերմաստիճանը բարձր էր (18):
80-ամյա թոշակառու Գորդոն Ուիլյամսին պատկանող ավտոմեքենայի ետևի նստարանին պառկած խաղալիք շանը նկատել է անցորդներից մեկը: Նրան թվացել է, թե շունը փակված է մնացել մեքենայում: Կանխազգալով հնարավոր հետևանքները` նա դիմել է ոստիկանություն:
Կենդանու ճակատագիրը մտահոգել է նաև դեպքի վայր ժամանած իրավապահներին: Շանը ջերմահարումից փրկելու համար ոստիկանները փորձել են կանչելով արթնացնել նրան, սակայն շունը չի արձագանքել: Ոստիկանները ստիպված են եղել կոտրել մեքենայի ապակին և կենդանուն շոշափելուց հետո են միայն հասկացել, որ իրենց այդքան անհանգստություն պատճառած սպանիելը փափուկ խաղալիք է:
Եվ քանի որ «փրկարարական օպերացիայի» պահին ավտոմեքենայի տերն այնտեղ չէր, ոստիկանները նրան գրություն են թողել` բացատրելով, թե ինչու են կոտրել մեքենայի ետևի դռան ապակին: Վարորդին պատճառած վնասի համար ոստիկանությունը նրան 180 ֆունտ (216 եվրո) փոխհատուցում կվճարի:
Միջադեպի կրկնությունը բացառելու համար անգլիացին սիրելի սպանիելին տեղափոխել է իր բնակարանի խոհանոց:
Նմանօրինակ միջադեպեր աշխարհում հաճախ են պատահում: Վերջերս Գերմանիայում «փրկել» են խաղալիք պինգվինի, իսկ Ուելսում` խաղալիք կատվի:
